Vlonjatet e Flamurtarit ngrisin lart trofeun e Superkupës së Shqipërisë në basketboll

Skuadra e femrave të Flamurtarit ka shkëlqyer sërish, duke rrëmbyer trofeun e Superkupës së Shqipërisë në basketboll. Në duelin final të zhvilluar në ambientet e Parkut Olimpik “Feti Borova”, vajzat nga Vlora kanë triumfuar ndaj Tiranës me shifrat 84-74, pas një paraqitjeje bindëse. Futja furishme në parket i dha avantazhin Flamurtarit që në start, duke fituar periodën hapëse me rezultatin 25-21. Dominimi i vlonjateve u konkretizua edhe gjatë pjesës së parë të ndeshjes, të cilën e mbyllën me një epërsi të sigurt prej 15 pikësh, 54-39. Edhe pse bardheblutë u përpoqën të ndryshonin rrjedhën e lojës në fraksionin e dytë – duke fituar periodën e tretë 21-17 dhe të katërtën 14-13 – ky reagim nuk mjaftoi për të përmbysur diferencën e krijuar në fillim nga rivalet. Ky sukses i radhës, i arritur menjëherë pas triumfit në Kupën e Federatës pak ditë më parë, konfirmon edhe një herë se Flamurtari mbetet ekipi për t'u mundur gjatë këtij sezoni në basketbollin e vajzave.