Çështja e ministres virtuale “Diella”, Gjykata Kushtetuese merr vendimin përfundimtar për kërkesën e opozitës

Gjykata Kushtetuese ka marrë sot vendimin për të rrëzuar padinë e dorëzuar nga deputetët e Partisë Demokratike, të cilët kishin kontestuar dekretin e Presidentit të Republikës, Bajram Begaj, lidhur me krijimin dhe funksionimin e “Diellës”, ministres virtuale të bazuar në inteligjencën artificiale. Në argumentimin zyrtar të bërë publik, kjo Gjykatë ka theksuar se nuk ka juridiksion apo kompetencë për ta shqyrtuar këtë çështje, duke arsyetuar se “Diella” nuk përfaqëson as një anëtar të kabinetit qeveritar dhe as ndonjë institucion ekzekutiv, si dhe nuk bën pjesë në përbërjen e Këshillit të Ministrave. Sipas vendimit të marrë me shumicë votash nga trupa gjykuese, pavarësisht emërtimit të përdorur në aktet e kontestuara, nuk bëhet fjalë për një funksionar të mirëfilltë me natyrë kushtetuese, çka solli edhe rrëzimin përfundimtar të nismës së opozitës. Kujtojmë se grupi parlamentar i opozitës i ishte drejtuar Gjykatës Kushtetuese me kërkesën për shfuqizimin e neneve përkatëse të dekretit presidencial, duke argumentuar se ato binin ndesh me parimet e Kushtetutës së vendit.