Skandali te “Lotaria Shtetërore”: Masë sigurie për dy menaxherët financiarë, akuzohen për zhdukjen e 1.3 milion eurove

Gjykata Themelore Penale në Shkup ka marrë vendim për caktimin e masave të sigurisë, duke vendosur paraburgim dhe arrest shtëpiak për dy zyrtarë të lartë financiarë të “Lotarisë Shtetërore”. Ky vendim vjen pas kërkesës zyrtare të Prokurorisë, e cila i mban të dyshuar për veprën penale të përvetësimit gjatë ushtrimit të detyrës zyrtare. Sipas hetimeve të Prokurorisë Themelore Publike në Shkup, të dy menaxherët dyshohen se kanë vepruar në bashkëkryerje gjatë gjithë vitit 2024. Ata akuzohen se nuk kanë dorëzuar dhe nuk kanë depozituar në llogaritë bankare të kompanisë të ardhurat ditore të grumbulluara nga pikat e shitjes. Në vend të kësaj, paratë e besuara për shkak të funksionit të tyre dyshohet se janë përvetësuar për qëllime personale, duke i shkaktuar ndërmarrjes një dëm prej 1.3 milion eurosh. Autoritetet e drejtësisë bëjnë me dije se të dyshuarit po përballen me akuzat për veprën penale të përvetësimit në detyrë, e cila parashikohet dhe dënohet sipas nenit 354, paragrafi 5, lidhur me paragrafët 3 dhe 1 të Kodit Penal. Në bazë të dosjes hetimore, gjatë vitit 2024, i dyshuari i parë në cilësinë e Drejtorit të Departamentit të Financës dhe Kontabilitetit, si dhe i dyshuari i dytë në detyrën e Shefit të Çështjeve Financiare pranë kësaj ndërmarrjeje publike për lojërat e fatit, duke shfrytëzuar pozitat dhe autorizimet e tyre ligjore, kanë bashkëpunuar për të përvetësuar fondet e kompanisë me qëllim sigurimin e përfitimeve të kundërligjshme pasurore për veten e tyre.