Sfidat e Gjermanisë me talentet: Drejtori i Bayernit përmend rastin e mesfushorit nga Kosova

Jochen Sauer, drejtor i zhvillimit të talenteve te klubi i njohur gjerman Bayern Munih, ka trajtuar çështjen e largimit të mundshëm të lojtarëve të rinj drejt kombëtareve të tjera, duke e ilustruar këtë dukuri edhe me shembullin e futbollistit me origjinë nga Kosova, Erblin Osmani. Gjatë një prononcimi për median “GOAL”, zyrtari i gjigantit bavarez është ndalur te rritja e futbollistëve të rinj në Gjermani dhe vështirësitë me të cilat përballet Federata Gjermane e Futbollit për t'i mbajtur ata nën ombrellën e saj. “Ka mjaft lojtarë të lindur në territorin gjerman, të cilët trajneri nuk mund t'i angazhojë në Përfaqësuese”, u shpreh Sauer, teksa renditi një sërë emrash të njohur si Kenan Yildiz, Can Uzun, Josip Stanishiq, Paul Wanner dhe Malik Tillman, të cilët mbajnë lidhje familjare apo kulturore me shtete të ndryshme. Në të njëjtën linjë diskutimi, ai vuri theksin te rasti i Erblin Osmanit, talentit të dalluar të akademisë së Bayernit që vjen nga Kosova. “Ne konstatojmë nga afër intensitetin e ftesave që adresojnë federata të ndryshme ndërkombëtare për profile të caktuara lojtarësh. Erblin Osmani, i cili ka lindur në Mynih, aktualisht është pjesë e Kombëtares A të Kosovës”, theksoi ndër të tjera Sauer.