Këmbanë alarmi nga Trepça: Sindikata kërkon veprim urgjent pas bllokimit të minatorëve në nëntokë

Sindikata e Pavarur e Minatorëve të Trepçës ka lëshuar një reagim të ashpër pas incidentit të fundit në minierë, ku disa punonjës mbetën të ngujuar në thellësi, duke e konsideruar këtë ngjarje si një kambanë alarmi për nivelin e sigurisë në ndërmarrje. Nëpërmjet një deklarate publike, kjo sindikatë ka shprehur shqetësimin e skajshëm për situatën e krijuar, duke rikujtuar se rreziku në punë është ngritur si shqetësim në mënyrë të vazhdueshme nga vetë minatorët. “Nuk mund të presim tragjedinë për të reaguar!”, thuhet qartë në reagimin e tyre zyrtar. Sipas përfaqësuesve sindikalë, prej kohësh janë ngritur shqetësime lidhur me kushtet e punës, pajisjet e vjetruara, rrugët emergjente, rreziqet profesionale dhe mungesën e investimeve në sigurinë dhe shëndetin e minatorëve. “Minatorët nuk mund të vazhdojnë të punojnë çdo ditë me frikën se një defekt teknik mund t’u rrezikojë jetën”, vijon më tej deklarata. Organi sindikal kërkon nga institucionet përgjegjëse një hetim të plotë dhe transparent të këtij incidenti, identifikimin e përgjegjësive, si dhe një vlerësim urgjent të gjendjes së pajisjeve, infrastrukturës, rrugëve të emergjencës dhe sistemeve të sigurisë në minierë. Po ashtu, kërkohet që shteti të ndërmarrë investime urgjente në sigurinë e minatorëve, duke paralajmëruar se deklaratat pas incidenteve nuk janë të mjaftueshme. “Nuk mjaftojnë deklaratat dhe reagimet vetëm pas incidenteve. Mediat po e pasqyrojnë me përgjegjësi zërin e minatorëve, por nuk mund të jetë vetëm media ajo që reagon. Institucionet duhet të veprojnë”, thekson Sindikata. Në fund, Sindikata e Pavarur e Minatorëve të Trepçës rikujton se, pavarësisht rëndësisë strategjike të Trepçës për Kosovën, jeta dhe shëndeti i minatorëve duhet të jenë mbi çdo pasuri tjetër. “Mos të presim që një incident i radhës të kthehet në tragjedi. Tani është momenti për veprim!”, përfundon reagimi i tyre. Në mbyllje, Sindikata ka shprehur mirënjohjen dhe ka falënderuar të gjithë ata që janë solidarizuar dhe kanë ndarë shqetësimin me punonjësit e nëntokës.