Kosova bëhet gati për sfidën e madhe në Kampionatin Evropian të Pingpongut në Slloveni

Sytë e botës së pingpongut evropian do të drejtohen nga “Arena Stozice” në Lubjanë të Sllovenisë, aty ku Kosova do të jetë pjesë e ngjarjes më prestigjioze individuale të kontinentit, Kampionatit Evropian Individual 2026, nën organizimin e ETTU-së. Në këtë aktivitet të rëndësishëm të kalendarit evropian, vendi ynë do të përfaqësohet nga garuesit Kreshnik Mahmuti dhe Shega Hashani. Ata do të shoqërohen nga trajneri Ridvan Hashani, ndërsa pjesë e delegacionit zyrtar do të jetë edhe kryetari i Federatës së Pingpongut të Kosovës (FPPK), Nehat Çitaku. Kjo ngjarje madhore në Lubjanë do të bashkojë emrat më të shquar të këtij sporti nga i gjithë kontinenti. Programi zyrtar i garave përfshin konkurrencën individuale për meshkuj dhe femra, atë në dyshe për të dyja gjinitë, si dhe ndeshjet në dyshe të përziera. Për më tepër, pikët e fituara në këtë kampionat do të kenë një peshë të madhe, pasi do të ndikojnë direkt në renditjen “European Mixed Team Ranking”. Kjo renditje është vendimtare për fazën kualifikuese të garës së ekipeve të përziera në Lojërat Evropiane 2027, si dhe për rrugëtimin drejt kualifikimeve olimpike. Sipas njoftimit zyrtar nga ETTU, ndeshjet e fazës preliminare do të nisin më 11 tetor, shorti kryesor do të hapet më 13 tetor, kurse ngjarja do të arrijë kulmin më 18 tetor, datë kur do të kurorëzohen kampionët e rinj evropianë në kategoritë individuale.