Capital T thyen heshtjen: Pse u tërhoqa nga skena këtë vit dhe paralajmërimi për albumin e ri

Reperi i njohur shqiptar, Capital T, ka rrëfyer arsyet e vërteta pas vendimit të tij për t'u shkëputur nga koncertet gjatë këtij viti, duke bërë një përjashtim të vetëm me ngjarjen “Wine & Stories of Berat”. Pas një dekade e gjatë me ritme të ngjeshura, udhëzime të pandërprera dhe performanca skenike, ai ndjeu nevojën urgjente për një pauzë reflektimi. Nëpërmjet një postimi të gjatë në rrjetet sociale, artisti sqaroi se ky vendim nuk erdhi vetëm si domosdoshmëri profesionale, por edhe njerëzore. “Wine & Stories of Berat ishte koncerti im i vetëm për këtë vit. Kjo pauzë nga skena ishte diçka që më duhej më shumë sesa e kisha menduar. Pas kaq shumë vitesh me koncerte, udhëtime, net pa gjumë, skena, festivale, qytete, shtete dhe mijëra njerëz përballë meje, këtë vit mora një vendim të vetëdijshëm: të mos bëja performanca”, u shpreh ai. Ai shtoi se zhvillimet sociale dhe ngjarjet që kanë shoqëruar popullin tonë luajtën gjithashtu rol në këtë vendim. Sipas tij, ka çaste kur gëzimi artistik nuk mund të bashkëjetojë shkujdesshëm me realitetin e përditshëm, duke e bërë të domosdoshëm një hap pas për të kuptuar më mirë botën përreth. Kjo shkëputje i shërbeu gjithashtu si një mundësi për të fituar qetësi personale, larg trysnisë së vazhdueshme për të qenë gjithmonë në qendër të vëmendjes dhe spirales ciklike të krijimtarisë dhe koncerteve. Periudhën e pushimit, Capital T e ka shfrytëzuar për t'iu përkushtuar punës në studio, ku po ndërton një material diskografik krejtësisht ndryshe. “Doja ta ktheja gjithë atë energji përsëri në studio dhe në muzikë. Duke punuar për një album të ri. Një album që për mua nuk është thjesht vazhdimi i asaj që kam bërë deri sot. Dua të flas për gjëra të tjera. Të prek tema që ndoshta nuk i kam prekur më parë”, theksoi reperi. Ky ngadalësim i ritmit i ka dhënë mundësinë të kthejë kokën pas dhe të analizojë dy dekadat e tij në skenë, të cilat i përshkruan si një kapsulë kohore e plotësuar me sfida, risi dhe eksperimente që kanë lënë gjurmë në tregun muzikor shqiptar. Në fund, artisti nuk la pa përmendur as kolegët e tij dhe zhvillimin pozitiv të industrisë vendase, duke vlerësuar faktin se skena muzikore po orientohet drejt koncerteve madhështore live. Ai e sheh këtë si një shenjë të rritjes kulturore dhe të ngritjes së standardeve, ku artistët guxojnë më shumë dhe publiku kërkon cilësi më të lartë.