Tentoi ta blinte me 40 euro për t'i shpëtuar ligjit për prerjen e druve, pranga të dyshuarit në Prizren

Uniformat blu kanë vënë në pranga një person në Prizren, i cili dyshohet se ka tentuar të korruptojë një zyrtar përgjegjës në Dragash, me qëllim që ky i fundit të mbyllte sytë para një veprimtarie të paligjshme pyjore. Sipas buletinit zyrtar 24-orësh të Policisë së Kosovës, i dyshuari ishte zënë duke prerë dru në mënyrë ilegale brenda hapësirës së Parkut Nacional. Për t'i shpëtuar ndëshkimit dhe procedurave ligjore, ai fillimisht i ka ofruar zyrtarit dy herë nga 20 euro si ryshfet. Pas ndalimit dhe përfundimit të procedurave të para hetimore, me urdhër të prokurorit kompetent, personi i dyshuar është dërguar në qendrën e mbajtjes për veprime të mëtejshme ligjore.