Minatorët nisin daljen nga nëntoka e Trepçës: Gjendja shëndetësore është stabile

Ka nisur procesi i evakuimit të minatorëve nga miniera e Trepçës, pasi këta të fundit kishin mbetur të ngujuar në thellësi për shkak të rrethanave të krijuara. Një prej minatorëve, i cili sapo ka dalë në sipërfaqe, ka konfirmuar se kolegët e tij që ndodhen ende brenda gëzojnë shëndet të mirë dhe janë duke ndërmarrë hapat për t'u larguar nga horizontet e minierës. “Dola nga horizonti i nëntë para rreth 30 minutash. Për momentin gjendja është e qëndrueshme. Një pjesë e minatorëve kanë mbetur ende atje, por tashmë u është dërguar ushqim. Ata janë duke u ngjitur shkallëve për të dalë. Kam besim se situata do të zgjidhet shpejt”, ka deklaruar minatori. Aktualisht, ekipet emergjente dhe ato teknike të minierës janë në terren duke vijuar operacionin për të mundësuar daljen e sigurt të të gjithë punonjësve që ndodhen nën tokë.