Protesta e 130-të në Tiranë: Aktivistët mobilizohen për një tubim masiv para Kuvendit

Kryeqyteti shqiptar është bërë sot sërish skenë e revoltës qytetare, ku për të 130-ën herë radhazi, qytetarët kanë marshuar kundër projektit të diskutueshëm të investimit në Zvërnec. Tubimi nisi në sheshin “Skënderbej” dhe vijoi me një marshim drejt godinës së Kryeministrisë, ku nuk munguan thirrjet e ashpra kundër qeverisë. Aktivistja Sidorela Vatnikaj, në fjalën e saj përpara protestuesve, denoncoi atë që ajo e quajti propagandë qeveritare, e cila sipas saj, ka pasur si synim zbehjen e lëvizjes qytetare. “Kur nisëm këtë rrugëtim, nuk e dinim nëse do t'ia dilnim përballë një pushteti që nuk përfaqëson më interesat e popullit. Kuvendi është shndërruar në zëdhënës të krimit të organizuar. Na kanë etiketuar në mënyra të ndryshme, por qëndresa jonë 130-ditore dëshmon se halli ynë është më i fortë se frika. Jemi më të fuqishëm se krimi i organizuar”, deklaroi Vatnikaj. Ndërkohë, aktivisti Arben Kola ka bërë thirrje për mobilizim të përgjithshëm ditën e nesërme para Parlamentit, duke e cilësuar si një moment kritik për vendin. “Nesër është dita vendimtare në parlament. Shqiptarët duhet të thonë një ‘jo’ të prerë. Nuk duhet të lejojmë miratimin e këtij ligji, pasi kalimi i tij do të ishte hapi i parafundit drejt shkatërrimit të Shqipërisë”, u shpreh ai. Kjo lëvizje qytetare, e cila e ka zanafillën më 31 maj si kundërshtim ndaj ndërhyrjeve në Zvërnec, ka evoluar gjatë këtyre muajve. Tashmë, kërkesat e protestuesve janë shtrirë përtej çështjes fillestare, duke përfshirë kundërshtimin e ndryshimeve ligjore për zonat e mbrojtura dhe anulimin e të ashtuquajturës ‘Paketë e Maleve’.