Pajtim historik në Gjakovë: Familjet Radi dhe Marku i japin fund hasmërisë pas 27 vitesh

Një ngjarje me rëndësi të veçantë shënoi 100-vjetorin e Famullisë 'Zonja Rruzare' në Bishtazhin të Gjakovës. Përveç kremtimit të këtij jubileu shekullor, dita u shndërrua në një moment reflektimi dhe paqeje, kur familja Radi vendosi t'ia falë gjakun familjes Marku, duke mbyllur kështu një kapitull të dhimbshëm që kishte nisur 27 vjet më parë. Në ceremoninë solemne, ku morën pjesë qindra besimtarë dhe përfaqësues institucionalë, u vlerësua roli i këtij institucioni fetar në ruajtjen e identitetit, gjuhës dhe kulturës ndër dekada. Kisha 'Zonja Rruzare' u cilësua si një dëshmitare e gjallë e historisë, e cila ka mbijetuar përballë sfidave të shumta. Imzot Rrok Gjonlleshaj, arkipeshkvi i Tivarit, gjatë meshës së shenjtë, theksoi rëndësinë e falënderimit për të gjithë ata që kontribuan në ekzistencën dhe funksionimin e kësaj famullie. Në të njëjtën frymë, famullitari Don Lush Sopi shprehu emocionet e tij për këtë përvjetor, duke e cilësuar atë si një mundësi për të nderuar të kaluarën dhe për të gjetur frymëzim për të ardhmen e komunitetit. Momenti më kulmor i festës ishte pajtimi mes familjeve Radi dhe Marku. Hasmëria mes tyre, e cila kishte rrënjë që nga viti 1997, u shua përfundimisht në praninë e të pranishmëve, duke dhënë një mesazh të fuqishëm për unitetin dhe faljen. Kryetari i Komunës së Gjakovës, Ardian Gjini, i pranishëm në këtë ceremoni, përshëndeti aktin fisnik të familjeve. 'Qofshi të bekuar për këtë vepër që bëtë sot. Pas 100 vitesh, ata që do të festojnë do t'i kujtojnë këto vepra të mira, pasi ne nuk do të jemi më këtu', u shpreh Gjini, duke vlerësuar lart gjestin e pajtimit. Famullia e Bishtazhinit, e cila u shkëput nga ajo e Gjakovës në vitin 1926, ka një histori të trazuar. Ajo u rrënua nga regjimi serb në vitin 1965, por falë përkushtimit të besimtarëve, u rindërtua dhe vazhdon të jetë vatër e shpirtërore dhe e bashkimit për banorët e kësaj zone.