Mbështetje për bizneset, Rama: 400 kërkesa në proces dhe 32 kredi të miratuara nga skema “Dyfisho Sipërmarrjen Tënde”

Kryeministri Edi Rama ka zhvilluar një takim me drejtues të bizneseve të vogla, ku në qendër të vëmendjes ka qenë e ecuria e programit mbështetës “Dyfisho Sipërmarrjen Tënde”. Në kuadër të kësaj nisme, rreth 400 sipërmarrje janë aktualisht në shqyrtim e sipër, ndërkohë që deri më tani numërohen 32 kredi të miratuara zyrtarisht, shifër kjo që përkthehet në një vlerë totale financimi prej rreth 5 milionë eurosh. Kreu i Qeverisë vuri theksin te rritja e ndjeshme e interesit nga ana e komunitetit të biznesit, duke vërejtur njëkohësisht edhe përshpejtim të ritmit të aplikimeve dhe miratimeve. Gjatë fjalës së tij, Rama shpjegoi se kjo mbështetje financiare i adresohet posaçërisht bizneseve të vogla dhe të mesme, të cilat pasi kanë kaluar fazën kritike të fillimit dhe janë stabilizuar në treg, synojnë zgjerimin e aktivitetit të tyre. “Programi “Dyfisho Sipërmarrjen Tëndë” ka ardhur si një nevojë për të mbështetur nga shumë afër sipërmarrje të vogla, të mesme që ia kanë dalë t’i mbijetojnë sfidave të krijimit të tyre në një treg të hapur, ia kanë dalë të përballojnë vështirësitë që çdo biznes i vogël përballon. Sot kanë akumuluar dije, kanë qartësi se si mund të rriten, por nuk kanë mundësitë financiare”, u shpreh ndër të tjera kryeministri. Më tej, ai detajoi kushtet lehtësuese që ofron ky instrument financiar për sipërmarrësit vendas. “Ne kemi krijuar këtë skemë, e cila faktikisht ofron një kredi me interes deri në 2%, kredi shumë e butë dhe me një garanci shtetërore deri në 70%. Është një kornizë shumë e favorshme, e bërë enkas për biznesin e vogël dhe të mesëm”, theksoi Rama. Në përmbyllje të fjalës së tij, kreu i ekzekutivit shprehu optimizëm për ecurinë e mëtejshme të programit: “Më vjen mirë që po shoh një rritje të interesit, sot që flasim kemi rreth 400 biznese që janë në proces, kemi praktikisht deri në 5 që janë shifrat 32 kredi të miratuara, për një vlerë që shkon te rreth 5 mln euro. Ajo që na vjen mirë të shohim është ritmi i përshpejtuar. Hapësira është për shumë më tepër”.