Opsion i ri në Serinë A për Elseid Hysajn, dështimi i marrëveshjes me Darmian afron kuqezetin

Karriera e Elseid Hysajt mund të marrë një kthesë të re në elitën e futbollit italian, pasi Bolonja ka shfaqur sërish interesim konkret për shërbimet e mbrojtësit të Kombëtares shqiptare. Drejtuesit e klubit, të cilët së fundmi dërguan drejtorin sportiv Xhovani Sartori për të ndjekur nga afër paraqitjen e tij, mbeten ende pa një marrëveshje përfundimtare me zgjedhjen e tyre të parë për krahun e prapavijës. Matteo Darmian është prej ditësh pjesë e seancave stërvitore të skuadrës, por mungesa e firmës zyrtare vjen si pasojë e dyshimeve të ngritura rreth gjendjes së tij fizike dhe dëmtimeve të shpeshta muskulore që e kanë shoqëruar kohët e fundit. Për këtë arsye, zyrtarizimi i marrëveshjes, i cili dukej vetëm çështje orësh, është shtyrë të paktën deri të enjten, periudhë gjatë së cilës lojtari do t'i nënshtrohet kontrolleve të mëtejshme mjekësore për të shuar çdo dilemë. Në këto rrethana, pista që çon te Elseid Hysaj është riaktivizuar fuqishëm. Mbrojtësi kuqezi konfirmoi një formë të shkëlqyer fizike gjatë angazhimeve të fundit në Ligën e Kombeve, ku u dallua me paraqitje të bindshme në fushën e lojës. Nëse bisedimet me Darmian dështojnë përfundimisht, rruga për transferimin e Hysajt te skuadra e drejtuar nga trajneri Rafaele Paladino do të jetë plotësisht e hapur.