Nisje e shkëlqyer për Dritën në Kupën Ballkanike, mposht rivalen nga Maqedonia e Veriut

Volejbollistet e Dritës nga Gjilani e kanë nisur me sukses rrugëtimin e tyre në edicionin e ri të BVA Balkan Cup, duke regjistruar një fitore të merituar në ndeshjen e parë. Vashat gjilanase mposhtën skuadrën Nakovski Volley me rezultatin e përgjithshëm 3:1 (25:20, 25:15, 20:25, 25:20), në takimin e zhvilluar në qytetin e Strumicës. Faza e parë e ndeshjes u karakterizua nga dominimi i fitueses së Kupës së Kosovës. Drita e fitoi setin hapës me shifrat 25:20, duke vendosur ritmin e lojës. Në setin e dytë, udhëzimet e dhëna nga trajneri Lorik Ilazi sollën një paraqitje edhe më bindëse në fushë, gjë që u reflektua drejtpërdrejt në rezultat, me gjilanaset që triumfuan thellë 25:15. Megjithatë, reagimi i ekipit maqedonas nuk mungoi në setin e tretë, të cilin e fituan në favor të tyre me shifrat 20:25, duke ngushtuar epërsinë. Seti i katërt solli emocione dhe tension, por vajzat e drejtuara nga Lorik Ilazi dëshmuan karakter, cilësi dhe angazhim maksimal. Ato nuk lejuan ndonjë kthesë të papritur në rezultat, duke e mbyllur këtë fraksion të lojës me shifrat 25:20 dhe duke vulosur fitoren totale të takimit. Pas këtij starti mjaft premtues në turnirin ndërkombëtar që po afron sfida të rëndësishme, Drita do të kërkojë vazhdimësinë e rezultateve pozitive. Në kuadër të ditës së dytë, e cila luhet më 7 tetor me fillim nga ora 17:00, skuadra kosovare do të matë forcat me gjigantin grek, Olympiacos. Vlen të theksohet se triumfuesi i këtij kompeticioni rajonal do të sigurojë një biletë për t'u ballafaquar me portugezet e Benficës në kuadër të Challenge Cup.