Dy gjigantët spanjollë në garë të nxehtë për yllin e ri të Manchester United

E ardhmja e JJ Gabriel, një ndër talentët më të spikatur në akademinë e Manchester United, duket se është larg “Old Trafford”, me Real Madridin dhe Barcelonën që po luftojnë për sigurimin e shërbimeve të tij. Vetëm muajin e kaluar, 16-vjeçari ndërmori hapa zyrtarë për t'u larguar nga klubi anglez, duke kërkuar prishjen e regjistrimit të tij si lojtar i akademisë, veprim ky që i hap dritën jeshile një transferimi të mundshëm. I vlerësuar lart si një nga futbollistët më premtues të gjeneratës së tij, Gabriel bëri bujë të madhe pas paraqitjeve fantastike me grupmoshat e “Djajve të Kuq”. Ai la shenjë që në ndeshjen e tij të parë në UEFA Youth League kundër Sabahut më 10 shtator, ku realizoi një tripletë, por prej asaj dite ai ka ndërprerë stërvitjet me skuadrën nga Manchesteri. Burime ndërkombëtare bëjnë me dije se adoleshenti tashmë ka zhvilluar seanca stërvitore në Barcelonë, ndërkohë që dy rivalët e përjetshëm të kampionatit spanjoll kanë intensifikuar lëvizjet e tyre. Edhe gazetari i njohur i “Sky Sports Germany”, Florian Plettenberg, ka konfirmuar se drejtuesit e Real Madridit dhe ata të Barcelonës kanë nisur tashmë kontaktet zyrtare me agjentët e lojtarit, duke vënë në tryezë propozime financiare mjaft joshëse. Shpresat e Manchester United për ta bindur djaloshin që të qëndrojë po shuhen dita-ditës, ndërsa verdikti përfundimtar mbi destinacionin e tij të ri pritet të jepet gjatë javëve në vijim. Përplasja e fortë mes katalanasve dhe madrilenëve për të siguruar firmën e një prej diamanteve më të lakmuar të futbollit evropian premton të jetë ndër sagat më të ndjekura të merkatos në ardhje.