Ndryshimet në Ligjin për Specialen, reagon Përparim Gruda pas shqetësimeve të BE-së

Përparim Gruda nga Partia Demokratike e Kosovës ka mbajtur një konferencë për media ku ka adresuar reagimet e fundit lidhur me miratimin e ndryshimeve në Ligjin për Dhomat e Specializuara të Kosovës, vendim ky që u mor nga Kuvendi gjatë mbrëmjes së së martës. Reagimet vijnë pasi një zëdhënës i Bashkimit Evropian i kërkoi zyrtarisht Kosovës që të respektojë detyrimet e saj ndërkombëtare dhe të sigurojë pavarësinë e plotë gjyqësore të këtij institucioni të drejtësisë. Duke iu përgjigjur këtyre zhvillimeve, Gruda përmendi vizitën e fundit të Presidentes së Komisionit Evropian në Prishtinë, duke kujtuar se ajo pati deklaruar se ndryshimi i ligjit është e drejtë sovrane e Kosovës. Lidhur me qëndrimin e fundit të zëdhënësit të BE-së, ai theksoi se nuk e ka parë një deklaratë të tillë në faqen zyrtare të BE-së, por dha garanci se institucionet e Kosovës nuk do të shkelin asnjë detyrim ndërkombëtar. Sipas Grudës, Kuvendi i Kosovës nuk është i obliguar të konsultohet me Gjykatën Speciale për iniciativat e veta legjislative, duke nënvizuar se pushteti ligjvënës nuk pyet pushtetin gjyqësor për ndryshime të tilla. Ai shtoi se çdo dilemë lidhur me kushtetutshmërinë e këtij ligji ka vetëm një adresë kompetente, e cila është Gjykata Kushtetuese në Prishtinë. Në fjalën e tij, Gruda nuk la pa falënderuar edhe qytetarët e Kosovës për angazhimin dhe protestat e tyre që kontribuan në miratimin e këtij projektligji. Gjatë kësaj konference, zyrtari i PDK-së komentoi edhe zgjedhjen e Justina Shiroka-Pulës në krye të shtetit, duke i përcjellë urimet më të sinqerta për sukses në detyrën e re. “I uroj në emër të Partisë Demokratike të Kosovës sukses në punën e saj si presidente, në respektimin e Kushtetutës së Kosovës, në mbrojtjen e lirive dhe të drejtave të njeriut dhe në garantimin e funksionimit demokratik dhe kushtetues të institucioneve, dhe veçanërisht në ushtrimin e rolit të saj si përfaqësuese e unitetit juridiko-kushtetues, siç është definuar qartësisht në Kushtetutën e Kosovës”, deklaroi Gruda.