Nagavci pas kompletimit të institucioneve: Kosova hyri në fazën e punës dhe vendimmarrjes

Kryetarja e Grupit Parlamentar të Lëvizjes Vetëvendosje, Arbërie Nagavci, ka bërë një reagim publik menjëherë pas zgjedhjes së shefes së re të shtetit, duke vënë në pah se pas një viti e tetë muajsh, tri cikleve zgjedhore parlamentare dhe një faze të gjatë paqëndrueshmërie institucionale, vendi ka përmbyllur tashmë ngritjen e të gjitha institucioneve kyçe. Sipas saj, pas kësaj periudhe sfiduese, prioriteti kryesor tashmë mbetet puna konkrete dhe marrja e vendimeve të duhura. “Kuvendi duhet të ecë përpara me agjendën legjislative. Institucionet duhet të përmbushin përgjegjësitë e tyre dhe të shtyjnë përpara zhvillimin e vendit. Për ne, kjo do të thotë më shumë punë, më shumë përgjegjësi dhe më shumë angazhim. Interesi i qytetarëve dhe forcimi i shtetit duhet të jenë në qendër të çdo vendimi. Institucionet janë kompletuar. Tani është koha të punojmë. Kemi shumë për të bërë”, ka shkruar Nagavci në rrjetin social, facebook.