Saim Tahiraj: Marrëveshjet politike nuk e zhbëjnë dot të vërtetën e Gjykatës Speciale

Veprimtari i njohur, Saim Tahiraj, ka analizuar zhvillimet e fundit politike në vend, duke u ndalur te procesi i zgjedhjes së presidentes së re të Kosovës dhe ndryshimet ligjore të ndërlidhura. Sipas Tahirajt, mbështetja për kreun e shtetit dhe ndërhyrjet në legjislacionin e Gjykatës Speciale dëshmojnë një koordinim të fshehtë politik mes forcave që ai i cilëson si “Fronti i Kuq”. Ai thekson se ky mekanizëm drejtësor ndërkombëtar u ngrit në partneritet të ngushtë me Shtetet e Bashkuara të Amerikës dhe Bashkimin Evropian, çka sipas tij e bën të pamundur ndryshimin e këtij realiteti përmes pazareve të brendshme. “Fronti i Kuq, i ndërtuar mbi të njëjtin substrat ideologjik, doli hapur nga skenët e errëta për të shfaqur fytyrën e vërtetë. Kur gjenden përballë sfidave madhore, ata bashkohen, bëjnë pazarllëqe dhe funksionojnë si një bllok i vetëm”, ka deklaruar ai, duke shtuar se frika nga Gjykata Speciale i ka nxjerrë në shesh. Duke komentuar veprimet e tyre, Tahiraj thekson se ata votuan ndryshimin e ligjit për Gjykatën Speciale krahas zgjedhjes së Presidentes, duke u entuziazmuar për një fiture të pretenduar, por – siç shprehet ai – “e bënë pa llogaritur partnerët”. Ai rikujton se ky institucion i drejtësisë erdhi nga Kuvendi i Kosovës në bashkëpunim të ngushtë me SHBA-në dhe BE-në, ndaj çdo tentativë për ta manipuluar situatën është e destinuar të dështojë përballë aleatëve strategjikë. Në të njëjtën kohë, Tahiraj ka shprehur miratimin e tij për qëndrimin e Lidhjes Demokratike të Kosovës (LDK), e cila, sipas tij, iu shmang përfshirjes në këto lëvizje të “Frontit të Kuq”. Ai ka kritikuar ashpër disa individë brenda këtij subjekti, duke i akuzuar se kanë vepruar për përfitime karrieriste dhe personale, por vlerëson se tashmë “maskat kanë rënë”. Në fund, ai bën thirrje që LDK-ja të fokusohet te mbështetja e kuadrove që i kanë qëndruar besnikë idealeve rugoviane dhe parimeve partiake. “Në ditët në vijim mjegulla do të shpërndahet dhe e vërteta do të dalë në shesh. Shumë prej atyre që festojnë sot do të ballafaqohen me pasojat e akteve të tyre. Jam tejet i gëzuar që LDK-ja ruajti distancën nga ky front, duke reflektuar zërin e vërtetë të anëtarësisë”, përfundon deklarata e Saim Tahirajt.