Dështon kontrata e Policisë për 10 qen zyrtarë, mbyllet kompania partnere në Hungari

Policia e Kosovës është detyruar të anulojë procesin e prokurimit për blerjen e 10 qenve zyrtarë, pasi operatori ekonomik hungarez i kontraktuar për këtë qëllim ka shpallur falimentimin. Ky aktivitet prokurimi kishte një vlerë të parashikuar prej 65 mijë eurosh dhe u zhvillua përmes procedurës së negociuar pa publikim të njoftimit për kontratë, duke u mbështetur në nenin 35 të Ligjit për Prokurimin Publik. Sipas dokumentacionit zyrtar, ky furnizim synonte t'i shërbente Njësisë K9 të Policisë së Kosovës, ndërsa procesi i selektimit dhe testimit të kafshëve ishte parashikuar të zhvillohej në territorin hungarez nga ekspertët e policisë. Megjithatë, marrëveshja mbeti e parealizuar. Nga ana e institucionit të sigurisë u konfirmua se anulimi erdhi pas marrjes së njoftimit zyrtar për mbylljen përfundimtare të kompanisë në Hungari me vendim gjykate, duke e bërë të pamundur vijimin e kontratës konform nenit 62 të LPP-së. Në sqarimin zyrtar thuhet se pengesa lindi pasi dy subjektet e tjera të përfshira në këtë procedurë ishin të autorizuara pikërisht nga kompania hungareze “Intercanine kft”, e cila tashmë ka ndërprerë aktivitetin e saj pas vendimit të autoriteteve kompetente. Kushtet e vendosura në dosjen e tenderit përfshinin kritere strikta për kafshët, duke synuar racat Malinois, Pastor Gjerman, Springer Spaniel dhe Cocker Spaniel, në moshën 10 deri në 18 muaj, të pajisura me dëshmi shëndetësore dhe të testuara për profilin e tyre të karakterit dhe aftësitë punuese. Plani parashikonte një kontratë kornizë me kohëzgjatje njëvjeçare, ku dorëzimi i qenve nga ana e furnitorit do të kryhej brenda një periudhe 30-ditore pas lëshimit të urdhërblerjes dhe kalimit të testimeve nga ana e Njësisë K9.