Zgjedhja e Presidentes Shiroka-Pula, Myftiu Tërnava ofron mbështetjen e plotë të BIK-ut

Kreu i Bashkësisë Islame të Kosovës, Myftiu Naim Tërnava, i ka dërguar një mesazh urimi akdemikes Justina Shiroka-Pula, me rastin e marrjes së detyrës së re si Presidente e Republikës së Kosovës. Në urimin e tij, Tërnava është shprehur i bindur se e para e vendit do ta drejtojë shtetin me integritet të lartë, duke luajtur një rol kyç në konsolidimin e institucioneve, si dhe në nxitjen e unitetit dhe bashkëpunimit të gjerë ndërinstitucional e politik. “Me ndjesi të veçanta përgëzoj akademiken Justina Shiroka-Pula për zgjedhjen në detyrën e Presidentes së Republikës së Kosovës”, ka deklaruar ndër të tjera Myftiu Tërnava. Gjatë këtij prononcimi, ai ka vlerësuar edhe kontributin e partive politike për arritjen e konsensusit rreth këtij posti, duke e cilësuar marrëveshjen e tyre si një hap të rëndësishëm që i garanton vendit stabilitet të qëndrueshëm institucional. Kreu i BIK-ut nuk ka lënë pa përmendur edhe miratimin e Ligjit për Dhomat e Specializuara në Hagë, duke shprehur pritshmërinë e tij që ky proces të rezultojë me drejtësi të plotë. Në vijim të mesazhit, Tërnava ka garantuar se Presidentja e re do të gjejë gjithmonë dyert e hapura dhe partneritetin e sinqertë të institucionit që ai drejton. “Do të keni mbështetjen dhe bashkëpunimin e sinqertë të Bashkësisë Islame të Kosovës, të institucioneve të saj dhe timen si Myfti i Kosovës, gjithmonë në shërbim të së mirës së vendit dhe interesit të popullit tonë”, ka theksuar ai në telegramin e tij. Në mbyllje të urimit, Myftiu Tërnava i ka përcjellë Presidentes Shiroka-Pula urimet për suksese, duke i dëshiruar forcë, urtësi dhe mbarësi në përmbushjen e përgjegjësive të larta shtetërore.