Thyhet heshtja për shëndetin e grave: Konferenca kombëtare kërkon vëmendje më të madhe ndaj menopauzës

Ka përfunduar me sukses dita e dytë e konferencës kombëtare kushtuar ndërgjegjësimit rreth menopauzës, një ngjarje që ka bashkuar drejtues institucionesh, profesionistë të shëndetësisë, paciente dhe qytetarë të shumtë. I ftuar në këtë ngjarje, Ministri i Shëndetësisë, Arben Vitia, ka shprehur mirënjohjen e tij për hapjen e një diskutimi kaq jetik, i cili deri më tani është trajtuar si temë tabu në shoqëri. Duke folur për sfidat e përditshme të gjinisë femërore, ministri Vitia u shpreh se ka gra që shkojnë në punë dhe institucione pas netëve pa gjumë, duke përballuar ndryshime trupore, ndërkohë që kujdesen për familjet, udhëheqin institucione dhe mbajnë mbi supe përgjegjësi të rënda, shpesh pa pasur mundësinë as të shprehin vështirësitë e tyre apo të dinë se kujt t'i drejtohen. Në vijim të diskutimeve, doktor Arbër Shehu vuri theksin te rëndësishmja e solidaritetit dhe fuqisë së bashkimit në trajtimin e këtyre kauzave të rëndësishme shoqërore. Sipas doktor Shehut, puna e nisur nga dy persona, që më pas zgjerohet në tre, katër apo pesë, tregon se energjia dhe fuqia e bashkimit kolektiv kanë një ndikim jashtëzakonisht të madh në arritjen e qëllimeve. Ndërkohë, drejtoresha ekzekutive e Agjencisë për Barazi Gjinore në Zyrën e Kryeministrit, Edi Gucia, e ka cilësuar menopauzën si një çështje të heshtur dhe tabu, duke njoftuar njëkohësisht angazhimin e institucioneve në këtë drejtim. Ajo bëri të ditur se Agjencia është duke punuar intensivisht në përgatitjen e dokumentit të ri strategjik, respektivisht Programit të Ri të Kosovës për Barazi Gjinore 2025–2035, i cili parasheh vizionin qeveritar për përmirësimin e shëndetit të grave, duke thyer mitin se kjo periudhë kalimtare duhet kaluar në heshtje pa bërë kurrfarë drame.