Forma e jashtëzakonshme e Edon Zhegrovës, klubi anglez që rrezikon të mbetet me gisht në gojë

Edon Zhegrova po kalon në një nga periudhat më të arta të karrierës së tij, duke dëshmuar një formë të jashtëzakonshme në fushën e gjelbër. Ylli me origjinë nga Kosova ka rikthyer shkëlqimin e tij të plotë, duke lënë gjurmë të pashlyeshme si me fanellën e Juventusit, ashtu edhe me Përfaqësuesen e Kosovës. Kjo ecuri fantastike bën që skuadra e Evertonit të ndiejë keqardhje pse nuk arriti ta siguronte shërbimet e futbollistit që tashmë krahasohet me emra të mëdhenj gjatë merkatos së verës. Interesimi i klubit nga Premier Liga kishte nisur që në merkaton e dimrit të kaluar dhe kishte vazhduar edhe përgjatë muajve të verës. Madhje, drejtuesit e Evertonit kishin shqyrtuar me Juventusin një formulë të mundshme huazimi me shkëmbim, ku sulmuesi Beto do të transferohej në Torino gjatë janarit, mirëpo bisedimet nuk kishin arritur të finalizoheshin me sukses. Futbollisti 27-vjeçar ishte shumë pranë largimit nga radhët e “Zonjës së Vjetër” para se të niste ky edicion futbollistik, por vendimi për të vazhduar qëndrimin në Torino po rezulton të jetë zgjedhja e duhur. Zhegrova e ka nisur sezonin në mënyrë mbresëlënëse, duke regjistruar tashmë dy gola dhe një asistim në vetëm katër paraqitje zyrtare me fanellën e Juventusit. Forma e lartë është konfirmuar edhe në arenën ndërkombëtare me Kosovën, ku anësori ka qenë protagonist i padiskutueshëm. Ai realizoi ndaj Austrisë në takimin e parë dhe kontribuoi me një asistim në ndeshjen e kthimit, duke u shpallur ndër lojtarët më të mirë në fushë. Në përballjen e së dielës kundër Austrisë, Zhegrova ishte arkitekti kryesor i golit të Kosovës, pasi depërtoi me klas nga krahu i djathtë për të shërbyer më pas për Fisnik Asllanin. Por, përveç kontributit direkt në gola, statistikat e tij individuale ishin tejet mbresëlënëse. Ai kompletoi 8 driblime, më shumë se çdo futbollist tjetër në fushë, pati 58 prekje të topit, kreu 6 ndërhyrje të suksesshme dhe rikuperoi topin në 6 raste. Për më tepër, paraqitja e tij u kurorëzua me fitimin e 15 a më shumë dueleve nga 19 gjithsej, duke u shpallur lojtari më dominues në këtë aspekt. Megjithëse Zhegrova ende nuk e ka nisur asnjë ndeshje të Serie A si titullar këtë edicion, ky realitet pritet të ndryshojë shumë shpejt, sidomos pas golave si zëvendësues dhe paraqitjeve fantastike me kombëtaren. Nëse Evertoni do të kishte arritur ta transferonte, ai do të përbënte një armë të fuqishme për formacionin e David Moyes, sidomos duke pasur parasysh vështirësitë që skuadra ka shfaqur në repartin e sulmit. Tashmë rrethanat kanë ndryshuar rrënjësisht. Ngritja e vazhdueshme e vlerës dhe formës së Zhegrovës lë të kuptohet se Evertoni ka lënë t'i ikë nga duart një mundësi e artë merkatoje.