Kthehet në rigjykim çështja e Sllagjan Trajkoviqit, i dënuar për krime lufte në Vushtrri

Gjykata e Apelit ka marrë vendim që të anulojë aktgjykimin e shkallës së parë kundër Sllagjan Trajkoviqit, i cili ngarkohet me akuza për krime lufte në Kosovë, duke e kthyer lëndën në pikën e zeros për rigjykim dhe rivendosje. Në dokumentin e siguruar bëhet e ditur se janë aprovuar si të bazuara ankesat e ushtruara nga Prokuroria Speciale e Republikës së Kosovës, nga mbrojtësi i të pandehurit, avokati Bogdan Laziq, si dhe ankesa e vetë të pandehurit Sllagjan Trajkoviq. Si pasojë, Apeli sipas detyrës zyrtare ka shpallur të pavlefshëm vendimin e Gjykatës Themelore në Prishtinë – Departamentit Special, konkretisht aktgjykimin PS.nr.32/2023 të datës 26.02.2026, duke kërkuar që i gjithë procesi të përsëritet. Kujtojmë se përmes aktgjykimit të datës 26 dhjetor 2025, Gjykata Themelore në Prishtinë e kishte shpallur fajtor Trajkoviqin, duke e dënuar atë me 10 vjet burgim efektiv. Sipas dokumentit zyrtar të datës 3 shtator 2026, kundër vendimit të shkallës së parë kishte paraqitur ankesë Prokuroria Speciale, e cila kishte konstatuar shkelje esenciale të dispozitave të procedurës penale, vërtetim të gabueshëm dhe jo të plotë të gjendjes faktike, si dhe shkelje të Ligjit Penal. PSRK-ja kishte kërkuar që aktgjykimi i Themelores të ndryshohej në atë mënyrë që Trajkoviq të shpallej fajtor edhe për pikat a, b dhe d të aktakuzës. Po ashtu, ankesë kishte dorëzuar edhe avokati mbrojtës Bogdan Laziq, i cili pretendonte se kishte pasur zbatim të gabuar të dispozitave procedurale e materiale, vërtetim jo të plotë të fakteve dhe pakënaqësi me dënimin e shqiptuar. Ai kishte propozuar që Apeli ose ta ndryshonte vendimin duke e liruar të mbrojturin e tij, ose t'ia ulte dënimin, apo ta kthente çështjen në rigjykim, duke kërkuar gjithashtu pjesëmarrjen e tyre në seancën e kolegjit të Apelit. Në anën tjetër, edhe vetë i pandehuri Sllagjan Trajkoviq kishte ngritur ankesë përmes së cilës kërkonte lirimin nga akuzat për krime lufte ose kthimin e lëndës në rigjykim, si dhe ndërprerjen e masës së paraburgimit përmes një vendimi të veçantë. Ndërkaq, Prokuroria e Apelit kishte kërkuar që të pranohej ankesa e Prokurorisë Speciale, kurse të refuzoheshin ankesat e palës mbrojtëse. Gjatë shqyrtimit të lëndës, Gjykata e Apelit ka gjetur se aktgjykimi i shkallës së parë përmban shkelje esenciale të procedurës penale, pasi nuk është hartuar në përputhje të plotë me Kodin e Procedurës Penale dhe vuan nga konstatimi i mangët i gjendjes faktike, mangësi këto që nuk mund të korigjohen pa një shqyrtim të ri gjyqësor. Kolegji i Apelit ka vlerësuar se vendimi i ankimuar nuk paraqet një unitet të qartë dhe të logjikshëm mes dispozitivit, provave të administruara, fakteve të vërtetuara dhe arsyetimit të dhënë nga gjykata. Në arsyetimin e vendimit theksohet se aktgjykimi nuk pasqyron qartë lidhjen e drejtpërdrejtë ndërmjet provave të siguruara, fakteve të konstatuara dhe konkluzioneve të nxjerra për çështjet kyçe të këtij procesi penal. Gjithashtu, Apeli ka gjetur se formulimi i dispozitivit të aktgjykimit nuk përputhet në mënyrë harmonike me përfundimet që gjykata e shkallës së parë i ka paraqitur në pjesën arsyetuese.