Ganimete Musliu pas zhvillimeve në Kuvend: Mbrëmë foli qëndresa, falënderime për qytetarët dhe deputetët e PDK-së

Deputetja e Partisë Demokratike të Kosovës, Ganimete Musliu, ka bërë një reagim publik pas miratimit të Ligjit për Dhomat e Specializuara dhe zgjedhjes së Justina Shiroka-Pulës në krye të shtetit si presidente e Kosovës. Nëpërmjet një postimi në rrjetet sociale, Musliu ka shprehur mirënjohjen e saj të thellë për mijëra qytetarë që, siç u shpreh ajo, qëndruan në sheshe për tri javë me radhë duke mbështetur kërkesat e tyre. “Mbrëmë foli qëndresa!”, ka shkruar Musliu, duke vënë në dukje se dy vendimet e rëndësishme të marra në Kuvend janë fryt i ditëve dhe netëve të gjata plot punë, sfida dhe qëndrueshmëri. Duke vlerësuar lart kontributin e qytetarëve që sfiduan shiun dhe të ftohtin gjatë protestave, ajo theksoi se ky aktivitet trejavor tashmë është shkruar në historinë e këtij procesi. Musliu po ashtu ka lavdëruar bashkëpunimin e deputetëve të PDK-së gjithë kësaj kohe, ndërsa ka drejtuar një falënderim të veçantë për kryetarin e partisë, Bedri Hamza, për përkushtimin e treguar. Sipas ligjvënëses së PDK-së, mbyllja e këtij kapitulli me votimin e ligjit dhe zgjedhjen e presidentes shënon njëkohësisht nisjen e një përgjegjësie të re për ruajtjen e Republikës, Kushtetutës, rendit demokratik dhe institucioneve. Në mbyllje të reagimit të saj, Musliu ka përcjellë mesazhet: “Rroftë demokracia! Rroftë Republika e Kosovës! Rroftë UÇK-ja!”