Mbështetje për qytetarët: Ndahen 15 milionë euro për subvencionimin e faturave të rrymës

Në mbledhjen e saj të pestë, Qeveria e Kosovës ka marrë vendim për miratimin e Programit për Mbrojtjen e Konsumatorëve të Cenueshëm të Energjisë Elektrike për periudhën 2026–2027. Ky plan parashikon alokimin e rreth 15 milionë eurove, të destinuara enkas për lehtësimin e pagesës së faturave të energjisë për shtresat në nevojë. Sipas nomativës së miratuar, nisma synon t'u dalë në ndihmë ekonomive familjare që përfshihen në skemat e mbrojtjes sociale, duke garantuar kështu qasje të barabartë në këtë shërbim jetik përmes mbështetjes financiare direkte për konsumatorët e rrezikuar. Në ditët në vijim pritet të finalizohet vendimi zyrtar që do të përcaktojë qartë kriteret dhe kushtet e aplikimit, procedurë kjo që do t'i hapë rrugë hapjes së thirrjes publike për të gjithë përfituesit e mundshëm. Përqendrimi kryesor i këtij programi mbetet te ndihma e drejtpërdrejtë financiare përmes subvencionimit të energjisë elektrike, si një ndër mekanizmat më efektivë për të mbrojtur familjet në nevojë nga barra e shpenzimeve. Në njoftimin e ministrisë theksohet gjithashtu se Republika e Kosovës është e angazhuar në përmbushjen e detyrimeve që derivojnë nga procesi i integrimit evropian dhe Plani i Rritjes për Ballkanin Perëndimor. Këto angazhime kërkojnë ngritjen e mekanizmave afatgjatë për identifikimin dhe ndihmën ndaj konsumatorëve të cenueshëm, ku përfshihet edhe funksionalizimi dhe mirëmbajtja e një regjistri të posaçëm për këtë kategori.