Skandali në Manastir: Detaje nga hetimi i prokurorit të dyshuar për korrupsion dhe ndikim të paligjshëm

Prokuroria Themelore Publike për Ndjekjen e Krimit të Organizuar dhe Korrupsionit ka nisur zyrtarisht procedurat hetimore ndaj një prokurori të lartë publik nga Prokuroria Themelore Publike e Manastirit. Ai dyshohet se ka kryer veprën penale të "Marrjes së shpërblimit për ndikim të paligjshëm", sipas dispozitave të Kodit Penal, njoftojnë autoritetet kompetente të akuzës. Sipas hetimeve paraprake, përmes zbatimit të masave të veçanta, janë siguruar dëshmi që ngrenë dyshime të forta se i dyshuari ka keqpërdorur pozicionin e tij zyrtar dhe autoritetin real. Ai dyshohet se ka ndikuar padrejtësisht te kolegët e tij prokurorë dhe gjyqtarë në të paktën katër raste të ndara, me qëllim që të siguronte kushte më të favorshme ose dënime më të lehta për personat nën hetim apo të pandehurit. Në kuadër të këtij operacioni, autoritetet kanë ndërmarrë kontrolle të imtësishme në banesën e zyrtarit të lartë dhe në zyrat e tij në Prokurorinë e Manastirit, me qëllim grumbullimin e provave materiale që do t'i shërbejnë zbardhjes së plotë të ngjarjes. Prokurori kompetent ka kërkuar nga gjyqtari i procedurës paraprake vendosjen e masave të sigurisë, të cilat përfshijnë marrjen e pasaportës dhe ndalimin e përkohshëm të ushtrimit të detyrës zyrtare, duke e larguar zyrtarisht të dyshuarin nga vendi i tij i punës, bëjnë të ditur nga PTHP.