Polemika e re në Spanjë: Vizita e Mbappé në Paris dhe përplasja e pretenduar me Mourinhon

Ylli i Real Madridit, Kylian Mbappe, ka përfunduar sërish në qendër të debateve në mediat spanjolle, por kësaj radhe jo për shkak të paraqitjeve të tij në fushën e blertë me fanellën e kombëtares franceze. Sulmuesi kryesor u detyrua të braktiste grumbullimin e Francës pas ndeshjes kundër Turqisë për shkak të shqetësimeve fizike, duke u rikthyer menjëherë në Madrid. Megjithatë, vetëm pak ditë më vonë, ai u kap nga aparatet e fotografëve në kryeqytetin francez nën shoqërinë e partneres së tij. Kjo ngjarje ka rikthyer në vëmendje një episod të ngjashëm të ndodhur vitin e kaluar, kur francezi kishte udhëtuar drejt Cagliarit gjatë fazës së rikuperimit, duke zgjuar pakënaqësi brenda kampit të Real Madridit. Megjithatë, situata mori dhenë edhe më shumë kur Mbappé publikoi një video duke ngarë biçikletën, veprim i cili u interpretua në Spanjë si një mesazh thumbues ndaj trajnerit José Mourinho. Tekniku portugez kishte paralajmëruar publikisht kohët e fundit se futbollistët e Real Madridit duhet të shmangin përdorimin e biçikletave për shkak të rrezikut të lartë të lëndimeve. Sipas emisionit të njohur spanjoll “El Chiringuito”, të martën Mbappé kaloi rreth një orë në kompleksin e Valdebebas, përpara se të nisej me fluturimin e orës 11:00 drejt Parisit, ku qëndroi gjatë gjithë ditës për t'u kthyer në Spanjë rreth orës 20:45. Megjithatë, detaji që ka ngjallur më shumë kureshtje dhe diskutime është një ngjarje e pretenduar gjatë drekës mes sulmuesit dhe trajnerit. Sipas burimeve televizive spanjolle, Mourinho thuhet se i ka bërë një vërejtje të hapur francezit para pjesëtarëve të tjerë të skuadrës, duke i thënë: “Do të të mbroj para mediave, por jo këtu.” Në opinionin sportiv spanjoll, e gjithë kjo histori konsiderohet si episodi i radhës që ushqen tensionet rreth figurës së Mbappés dhe dinamikave të marrëdhënies së tij me klubin madrilen.