Prapaskenat e bujshme: Pse trajneri i Portugalisë u vu nën presion për t'i kërkuar falje Ronaldos

Një dëshmi e bujshme ka hedhur dritë mbi tensionet e fundit mes përzgjedhësit të Portugalisë, Jorge Jesus, dhe yllit botëror, Cristiano Ronaldo. Carlos Padrao, një mik i ngushtë i trajnerit, ka bërë publike detaje se si tekniku u vu para një ultimatumi për shkak të një përplasjeje me sulmuesin. Sipas rrëfimit të bërë në emisionin “Jogo Aberto” të transmetuar në SIC Noticias, një bashkëpunëtor i afërt i Ronaldos kishte ndërhyrë duke kërkuar masa ekstreme ndaj trajnerit. Bëhet fjalë për Tiago Craveiro, i cili thuhet se kishte vendosur një kusht të prerë përmes një njeriu të besuar të rrethit të Jesusit: ose tekniku do t’i kërkonte falje publike Ronaldos që në nisje të konferencës për shtyp, ose do të përballej me shkarkimin nga detyra. Megjithatë, Padrao sqaroi se ky mesazh kërcënues nuk i kishte shkuar drejtpërdrejt trajnerit, por kishte kaluar përmes palëve të treta, siç mund të ketë qenë avokati i tij apo një tjetër person i besuar. “Ata u përpoqën t’i impononin një skenar Jorge Jesusit që ai t’i kërkonte falje publike Cristiano Ronaldos”, u shpreh Padrao gjatë diskutimit televiziv. Pavarësisht këtij presioni të madh, strategu portugez refuzoi të bëjë atë që i kërkohej. Edhe pse pranoi publikisht se kishte bërë një gabim dhe sqaroi arsyet e qëndrimit të tij, ai nuk lëshoi pe për kërkimfalje. “Të pranosh një gabim është një gjë, ndërsa të kërkosh falje është krejtësisht diçka tjetër”, shtoi miku i trajnerit, duke mbrojtur vendimin e këtij të fundit. Po ashtu, u zbulua se situata e krijuar e kishte rënduar emocionalisht trajnerin. Padrao tregoi se gjatë një bisede telefonike të mëngjesit të së martës, Jesus ishte shprehur “shumë i trishtuar” për ngjarjet. Në epiqendër të kësaj krizë është vendosur Tiago Craveiro, një figurë e njohur në futbollin ndërkombëtar, i cili më parë ka qenë i angazhuar në grupet e punës të FIFA-s dhe UEFA-s, si dhe ka mbajtur pozitën e administratorit të garave të klubeve në shtëpinë e futbollit evropian.