Ndikimi i njeriut: Si po detyrohet monali i Himalajeve të ndryshojë mënyrën e jetesës dhe komunikimit

Zgjerimi i aktivitetit njerëzor po lë gjurmë të thella në sjelljen dhe mënyrën e komunikimit të monalit të Himalajeve, paralajmërojnë dy kërkime të realizuara nga studiues indianë. Ky lloj shpendi, që mban statusin e simbolit kombëtar të Nepalit dhe është gjithashtu shpendi shtetëror i Uttarakhandit në Indi, po ndeshet me tkurrjen e mjedisit të tij natyror si pasojë e hovit të turizmit dhe ndërtimeve infrastrukturore, ndërkohë që ndotja akustike po detyron transformimin e mënyrës se si ata komunikojnë. Rezultatet e njërit prej studimeve dëshmojnë se monalët po detyrohen të tërhiqen drejt majave më të larta, për shkak se livadhet alpine po kufizohen ndjeshëm nga ndërhyrjet e njeriut. Në anën tjetër, parashikimet e ngrohjes globale tregojnë se deri në vitin 2100 habitati i tyre do të pësojë zvogëlim dhe copëzim edhe më të madh, duke ngritur alarmin për sukses të ulët në riprodhim dhe madje zhdukje në shkallë lokale. Në kuadër të kërkimit të dytë, shkencëtarët kanë analizuar mbi 700 tinguj të lëshuar nga monalët në dy lugina të ndryshme të Uttarakhandit. Në mjediset e ngarkuara me qarkullim automjetesh dhe vizitorë, këta zogj shfrytëzojnë frekuenca më të larta dhe lëshojnë thirrje më të përmbledhura për të kapërcyer zhurmat e krijuara nga njerëzit. Ekspertët sqarojnë se ky reagim përbën një përshtatje të menjëhershme sjelljeje dhe jo një zhvillim evolucionar. Sipas të dhënave të transmetuesit britanik BBC, specialistët vlerësojnë se transformimet në habitatin natyror dhe në format e komunikimit dëshmojnë qartë për ngarkesën në rritje që po i kanoset ekosistemit të ndjeshëm të Himalajeve, nën presionin e turizmit, zgjerimit urban, ndërtimeve dhe ndryshimeve klimatike.