Dy kuqezinj shkëlqejnë në formacionin e javës të Ligës së Kombeve, Asllani krah Olise me notën maksimale

Faqja e njohur e statistikave sportive “SofaScore” ka publikuar 11-shen më të mirë për ndeshjet e zhvilluara në kuadër të raundit të katërt të fazës së grupeve në Ligën e Kombeve, ku spikat prania e dy futbollistëve të Kombëtares shqiptare. Falë paraqitjes fantastike dhe dopietës së realizuar kundër San Marinos, mesfushori Kristjan Asllani është shpërblyer me notën maksimale 10 nga ana e analistëve të platformës, pas një ndeshjeje të interpretuar në mënyrë të përsosur. Interesant është fakti se Asllani ndan këtë vlerësim maksimal prej 10 pikësh vetëm me një tjetër emër të madh të futbollit ndërkombëtar, yllin e Francës dhe të Bayern Munich, Michael Olise, i cili është lojtari i dytë që ka arritur këtë kuotë në këtë formacion ideal. Krahas tij, pjesë e kësaj liste elitare është bërë edhe një tjetër titullar i kuqezinjve, mbrojtësi i krahut të djathtë Elseid Hysaj, i cili është vlerësuar me notën 7.9. Pavarësisht faktit se aktualisht po kalon një periudhë pa skuadër, 32-vjeçari ka konfirmuar edhe një herë tjetër se ruan standarde të larta paraqitjeje në fushën e blertë.