Dy gjigantët e Evropës, PSG dhe Liverpool, vihen në ndjekje të talentit të Manchester Cityt

Paris Saint-Germain dhe Liverpooli po ndjekin me vëmendje zhvillimet rreth Rayan Cherkit, duke shqyrtuar mundësinë e një lëvizjeje nëse Manchester City detyrohet të lirojë disa nga lojtarët e tij kryesorë si pasojë e problemeve financiare me të cilat po ballafaqohet klubi nga Premier League. Kujtojmë se Manchester City është shpallur fajtor për shkelje të rënda të rregullave financiare të kampionatit anglez, shkelje që përfshijnë harkun kohor nga sezoni 2009/10 deri në atë 2017/18. Sipas hetimeve, bëhet fjalë për mospërputhje në deklarimin e të ardhurave dhe shpenzimeve që kapin shifrën e mbi 900 milionë paundëve. Megjithëse drejtuesit e klubit anglez i kanë hedhur poshtë këto akuza dhe kanë ushtruar të drejtën e ankimit, çdo vendim përfundimtar që do të sillte sanksione drastike – përfshirë detyrimin për të shitur futbollistët kryesorë – pritet të tronditë tregun e transferimeve. Burime pranë zhvillimeve bëjnë të ditur se si parisienët, ashtu edhe “Reds”-at, e kanë vënë në shënjestër francezin si një objektiv strategjik për të ardhmes. Futbollisti francez, i cili zgjodhi Premier Leaguen për të nisur një kapitull të ri në karrierën e tij, ka shfaqur paraqitje mjaft pozitive përgjatë sezonit 2026/27. Deri më tani, ai ka kontribuar me katër gola dhe dy asistime për skuadrën e tij. Për momentin, Cherki është i lidhur me “Citizens” përmes një kontrate të vlefshme deri në vitin 2030, ndërsa kartoni i tij llogaritet në rreth 90 milionë euro në tregun e transferimeve. Ndonëse këto shifra dhe afati i gjatë i kontratës e bëjnë një operacion të tillë mjaft të ndërlikuar, një skenar ku Manchester City detyrohet të ristrukturojë organikën do t'i shtynte PSG-në dhe Liverpoolin të hidhen në sulm për shërbimet e 23-vjeçarit. Kjo betejë e mundshme për firmën e Cherkit premton të kthehet në një ndër telenovelat kryesore të merkatos në dyert e stadiumit “Etihad”, veçanërisht nëse situata ligjore e klubit anglez prodhon largime të bujshme.