Kushti i Uashingtonit për paqe: Vance kërkon nga Teherani frenim të menjëhershëm të programit bërthamor

Zëvendëspresidenti i Shteteve të Bashkuara, JD Vance, ka theksuar se autoritetet iraniane duhet të ndërmarrin një zvogëlim thelbësor të kapaciteteve të tyre për pasurimin e uraniumit, si parakusht kyç për arritjen e një marrëveshjeje që do t'i jepte fund luftës shtatëmujore mes dy shteteve. Gjatë deklaratave të tij, Vance bëri të qartë se Uashingtoni nuk do të mjaftohet vetëm me premtime për të ardhmen, por insiston në hapa të menjëhershëm dhe të prekshëm nga Teherani për të ulur potencialin aktual bërthamor. “Ne nuk do të shkëmbejmë fjalë me veprime”, u shpreh zëvendëspresidenti amerikan, duke vënë në pah se pala amerikane pret dëshmi reale të angazhimit nga ana e Iranit. Sipas numrit dy të administratës amerikane, vazhdimi i pasurimit të uraniumit në shkallë të lartë bie në kundërshtim të plotë me insistimin e vazhdueshëm të Teheranit se ambiciet e tij bërthamore janë të natyrës paqësore dhe nuk synojnë armatimin. Gjatë javëve të fundit, dy vendet kanë intensifikuar diplomacinë duke shkëmbyer disa propozime, me qëllim gjetjen e një gjuhe të përbashkët për armëpushim dhe zhbllokimin e Ngushticës së Hormuzit, e cila luan një rol jetik për furnizimin global me energji. Ndonëse konfirmoi se Shtëpia e Bardhë mbetet e angazhuar për dialog dhe arritjen e një pakti, Vance pranoi se mekanizmat e vendimmarrjes në hierarkinë e Teheranit mbeten shpesh herë të paqartë për palën amerikane gjatë procesit negociues. Zëvendëspresidenti, i cili në të kaluarën ka mbajtur qëndrime kritike ndaj angashimeve ushtarake amerikane jashtë vendit, është angazhuar personalisht në linjën e parë të përpjekjeve diplomatike për të siguruar një zgjidhje paqësore të krizës. Në përmbyllje, ai ritheksoi se çdo marrëveshje afatgjatë dhe e qëndrueshme nuk mund të jetë e plotë pa vendosjen e kufizimeve të qarta dhe të matshme mbi programin e pasurimit bërthamor të Iranit.