Koalicioni VLEN: Kosova tregoi pjekuri demokratike, urime Presidentes së re

Koalicioni VLEN ka vlerësuar se Kosova ka dëshmuar se demokracia, dialogu politik dhe mbështetja e institucioneve përbëjnë çelësin për kapërcimin e sfidave më komplekse politike. Sipas kësaj force politike, ngritja e Justina Shiroka-Pulës në krye të shtetit si Presidente e re i jep zgjidhje bllokadës institucionale dhe krijon kushtet për normalizimin e plotë të punës së organeve shtetërore në Republikën e Kosovës. “Presidentes së re i urojmë suksese në këtë mision dhe shprehim besimin se bagazhi i saj profesional në fushën e politikës, arsimit dhe shkencës do të kontribuojë në konsolidimin e institucionit të Presidentit dhe ruajtjen e stabilitetit në vend”, thuhet në deklaratë. Po ashtu, VLEN ka përshëndetur arritjen e konsensusit për votimin në lexim të dytë të amendamenteve për Ligjin për Gjykatën Speciale. Ky dakordim dëshmon qartë se përmes bisedimeve dhe gatishmërisë për kompromis, mund të arrihen zgjidhje edhe për temat më të ndjeshme. “Momenti ka ardhur që strukturat institucionale të vihen në lëvizje, skena politike t'i kthehet fokusit te qytetarët, kurse Kosova të avancojë drejt së ardhmes me stabilitet, llogaridhënie dhe vlera demokratike”, përfundon reagimi i VLEN.