Zgjedhja e presidentes dhe kauza për UÇK-në, Hamza: Shteti duhet t’i dalë në krah çlirimtarëve

Kryetari i Partisë Demokratike të Kosovës, Bedri Hamza, ka ndarë qëndrimin e tij lidhur me dinamikat e fundit politike në vend, duke vlerësuar se nata e mbrëmshme, ndonëse e mundimshme për Kosovën, mund të shërbejë si një pikë kthese drejt një të ardhmeje më të ndritur për shtetin. Në reagimin e tij, Hamza ka theksuar se bashkëpunimi me institucionet shtetërore dhe Presidenten e sapozgjedhur, Justina Shiroka-Pula, do të intensifikojë përpjekjet për mbrojtjen e ish-liderëve të Ushtrisë Çlirimtare të Kosovës, duke garantuar angazhim institucional për drejtësi, të vërtetën dhe vlerat e luftës. Sipas tij, barra e rëndë e këtij procesi në Hagë, e cila për afro gjashtë vjet është mbajtur kryesisht nga individët, familjet dhe mbrojtësit, kërkon tashmë mbështetjen e plotë të shtetit, i cili duhet të vërë në dispozicion të gjitha kapacitetet e veta institucionale. Lideri i PDK-së ka përcjellë mirënjohjen e tij për qytetarët që protestuan anembanë Kosovës dhe në diasporë, duke u shndërruar në zërin e fuqishëm të ish-krerëve të UÇK-së dhe në një faktor kyç të këtij rrugëtimi. Ai ka vënë në pah domosdoshmërinë e një shteti që nuk tregohet indiferent dhe nuk tërhiqet përballë përpjekjeve për tjetërsimin e historisë dhe të vërtetës sonë çlirimtare. Duke përmendur Deklaratën e Përbashkët të vullnetit politik në Kuvend, ligjin për mbrojtjen e UÇK-së dhe zgjedhjen e presidentes, Hamza ka bërë thirrje për një koordinim të gjerë dhe mbështetje gjithëpërfshirëse për këtë kauzë mbarëkombëtare. Në mbyllje të mesazhit të tij, ai ka apeluar për unitet dhe veprime konkrete. “UÇK-ja na bashkoi në një vizion. Tani është koha që atë vizion ta shndërrojmë në një mision të përbashkët, me angazhim dhe vepra konkrete. Beteja jonë për drejtësi duhet të vazhdojë. Dhe në këtë betejë, çlirimtarët tanë nuk do të jenë vetëm. Duhet të jemi të gjithë bashkë!”, ka përfunduar Hamza.