Skandali në CIA: Ish-oficeri pranon vjedhjen e 194 milionë dollarëve, pasuria marramendëse gjendet në shtëpi

Një ish-oficer i inteligjencës amerikane (CIA) ka pranuar fajësinë për përvetësimin e rreth 194 milionë dollarëve, fonde të dedikuara për operacione sekrete. David Rush, 49 vjeç, u shfaq të martën para gjykatës federale në Aleksandri, pranë Uashingtonit, ku përmes një marrëveshjeje me prokurorinë, konfirmoi akuzat e rënda që rëndojnë mbi të. Seanca për shpalljen e dënimit është caktuar për datën 28 janar. Rush përballet me një dënim maksimal prej 20 vitesh burgim, si dhe obligimin ligjor për të kthyer shumën e përvetësuar dhe për të paguar gjobat përkatëse. Sipas Departamentit amerikan të Drejtësisë, abuzimet e tij ndodhën në periudhën tetor 2025 deri në maj 2026, kohë kur ai u arrestua. Hetimet zbuluan se fondet e destinuara për misione të ndjeshme ishin shfrytëzuar nga Rush për blerje luksoze, duke përfshirë pasuri të paluajtshme, automjete të shtrenjta dhe aksesorë me vlerë. Gjatë bastisjes së banesës së tij në maj, agjentët e FBI-së zbuluan një thesar të vërtetë: rreth 300 shufra ari, 30 ora luksoze dhe mbi 2 milionë dollarë kesh, vlera e arit të sekuestruar vetëm kap shifrën e 46 milionë dollarëve. Prokurori i Përgjithshëm, Todd Blunts, theksoi se shërbëtorët publikë kanë për detyrë primare t'i shërbejnë shtetit dhe popullit, e jo interesave personale. Nga ana tjetër, drejtori i CIA-s, John Ratcliffe, deklaroi se Rush kishte tradhtuar besimin e institucionit dhe kishte abuzuar rëndë me pozitën e tij, duke shtuar se rasti u zbulua falë një hetimi të brendshëm të agjencisë. Dosja gjyqësore përmban edhe detaje alarmante mbi rrezikimin e sigurisë kombëtare. Rush dyshohet se ka dekonspiruar një burim sekret njerëzor të inteligjencës amerikane, duke ia përcjellë informacionet një agjenti të huaj në fund të vitit 2025, ndonëse për këtë pjesë nuk është ngritur ende një akuzë direkte në këtë fazë procedurale. Në kohën e shërbimit, Rush dispononte leje të nivelit të lartë të sigurisë, të cilën e kishte fituar duke manipuluar të dhënat për karrierën e tij ushtarake në Marinën Amerikane dhe kualifikimet akademike. Ky zbulim shton hijet e dyshimit mbi proceset e verifikimit të sigurisë për pozicionet delikate në agjencitë e inteligjencës.