Tmerr në Athinë: Sulm me armë zjarri ndaj një kafeneje, plagoset e mitura shqiptare

Një ngjarje e rëndë ka tronditur mbrëmjen e së premtes lagjen Agios Panteleimona në kryeqytetin grek, ku një sulm i armatosur ka lënë pas një të mitur të plagosur. Rreth orës 23:50, një automjet në të cilin ndodheshin katër persona iu afrua lokalit të vendosur në rrugën “Agorakritou” nr. 32, duke qëlluar në drejtim të tij. Për pasojë, një vajzë rreth 10 vjeç, me origjinë shqiptare, ka marrë një plagë në këmbë. Autoritetet janë ende duke hetuar nëse lëndimi është shkaktuar nga një plumb direkt apo nga copëza sendesh të goditura gjatë të shtënave. Në një përpjekje për t'i siguruar ndihmë sa më të shpejtë të bijës, nëna e fëmijës nuk ka pritur mbërritjen e autoambulancës, por e ka transportuar vetë atë drejt Spitalit të Fëmijëve “Aglaia Kyriakou”, ku po merr trajtimin e nevojshëm mjekësor. Në momentin e këtij sulmi të beftë, brenda ambientit të kafenesë ndodheshin 10 shtetas shqiptarë. Pak kohë pas ngjarjes, policia gjeti një automjet të djegur, i cili dyshohet se është përdorur nga autorët për t'u larguar nga vendi i krimit. Forcat e rendit kanë rrethuar zonën dhe kanë nisur një operacion të gjerë hetimor për të zbardhur dinamikën e plotë të këtij sulmi, si dhe për të bërë të mundur identifikimin dhe kapjen e autorëve të përfshirë.