PDK zyrtarizon kandidaturat për presidente: Eliza Hoxha dhe Besa Shiroka-Pula në garë

Kryetari i Partisë Demokratike të Kosovës (PDK), Bedri Hamza, ka kërkuar një qasje më të përgjegjshme dhe serioze ndaj zhvillimeve aktuale politike dhe proceseve të ndërtimit të institucioneve të shtetit. Lidhur me agjendën legjislative, Hamza konfirmoi se deputetët e PDK-së do të jenë të pranishëm në Kuvend për të votuar ligjin për Dhomat e Specializuara, duke shprehur gatishmërinë e partisë për ta mbyllur sa më parë këtë çështje të rëndësishme. Sa i përket procesit të zgjedhjes së presidentit, kreu i PDK-së bëri të ditur se Besa Shiroka-Pula është një profil i pranueshëm për këtë pozitë. Me qëllim të respektimit të procedurave kushtetuese dhe për të siguruar funksionimin e procesit zgjedhor, ai njoftoi se partia e tij do të zyrtarizojë edhe deputeten Eliza Hoxha si kundërkandidate. “Për Partinë Demokratike të Kosovës, ajo është një emër i pranueshëm për presidente. Përveç kësaj, me qëllim që të zhvillohen procedurat dhe të plotësohen kushtet, Partia Demokratike e Kosovës e propozon si kundërkandidate edhe zonjën Eliza Hoxha”, deklaroi Hamza. Në fund, Hamza nënvizoi se PDK-ja është e gatshme për seancë dhe u ka bërë thirrje subjekteve të tjera politike që të marrin pjesë në Kuvend, në mënyrë që proceset institucionale të vijojnë pa pengesa.