Lushtaku ashpër ndaj Kurtit: Po bën pazare me ligjin e UÇK-së për postin e presidentit

Deputeti i Partisë Demokratike të Kosovës, Mërgim Lushtaku, ka drejtuar akuza të rënda ndaj kryeministrit Albin Kurti, pas deklaratave të këtij të fundit rreth propozimeve për zgjedhjen e presidentit dhe ndryshimeve ligjore. Reagimi i ligjvënësit opozitar vjen pas konferencës së kreut të ekzekutivit, ku sipas tij, po synohet kushtëzimi i votimit për Dhomat e Specializuara për interesa të ngushta politike dhe autoritare. "Kryeministri, si një pazarxhi, po kushtëzon votën për ligjin që mbron historinë tonë të lavdishme vetëm për ambiciet e tij politike", ka shkruar Lushtaku në rrjetet sociale. Gjatë reagimit të tij, ai ka përdorur edhe tonë ironike, duke kërkuar që Kurtit t'i rikujtohet funksioni që mban. "Kallxoni dikush se është kryeministër i Qeverisë së Kosovës, se mos po habitet", ka shtuar ai. Në fund, deputeti i PDK-së ka nënvizuar se ky projektligj nuk duhet të përfshihet në asnjë lloj pazari mes subjekteve politike, duke kërkuar reflektim urgjent. "E pastaj kujtojani se ky ligj është për Ushtrinë Çlirimtare të Kosovës, e jo për partitë politike", ka përfunduar deklaratën e tij Lushtaku.