Zulfaj jep alarmin: Zgjedhjet e reja rrezikojnë rreth 90 milionë euro fonde për Kosovën

Kryenegociatori i Kosovës në dialogun me Bashkimin Evropian, Jeton Zulfaj, ka dhënë një paralajmërim serioz se mbajtja e zgjedhjeve të reja mund t'i kushtojë vendit humbjen e miliona eurove nga Plani i Rritjes i BE-së. Duke vënë theksin te afatet kohore për përmbushjen e reformave, Zulfaj bëri të ditur se nga ky Plan i Rritjes, shuma prej 131,4 milionë eurosh që ndërlidhet me 22 hapa konkretë ka si afat të fundit datën 31 dhjetor të këtij viti. “Pa Kuvend funksional dhe pa Qeveri me kapacitet të plotë, mund të humbim afër 90 milionë euro”, ka deklaruar Zulfaj. Sipas tij, nëse Kuvendi dështon të zgjedhë Presidentin gjatë ditës së sotme, vihet në pikëpyetje të madhe realizimi i pjesës dërrmuese të reformave të parashikuara në këtë plan. Zulfaj ka rikujtuar gjithashtu rastin e projektligjeve që mbetën peng i bllokadave parlamentare gjatë muajit qershor, vonesa këto që sipas tij rrezikojnë të na lënë pa mbi 40 milionë euro. “Projektligjet që ngecën në qershor për shkak të bllokadës në Kuvend, dhe për të cilat pritet të humbim mbi 40 milionë euro, i miratuam sërish në Qeveri, ia dërguam Kuvendit dhe dje kaluan në lexim të parë”, ka thënë ai. Ai ka paralajmëruar se dështimi në zgjedhjen e Presidentit sot do të pamundësojë kalimin e këtyre projektligjeve në lexim të dytë, duke e detyruar ekzekutivin t'i nisë procedurat nga e para, fillimisht në Qeveri e më pas në Kuvend. Në mesin e akteve ligjore të bllokuara, ai veçoi Ligjin për parandalimin e pastrimit të parave dhe financimit të terrorizmit, miratimi i të cilit do t'i hapte rrugë anëtarësimit të Kosovës në zonën SEPA. Zulfaj kujtoi se ky ligj kishte marrë dritën jeshile nga Kuvendi në përmbyllje të vitit 2024, por ishte kontestuar në Gjykatën Kushtetuese nga Partia Demokratike e Kosovës (PDK). “Çdo vit jashtë SEPA-s u kushton qytetarëve dhe bizneseve tona rreth 55 milionë euro”, ka deklaruar ai. Në përmbyllje të prononcimit të tij, Zulfaj e ka cilësuar bllokadën aktuale si një vendim të paramenduar politik, duke drejtuar akuza të drejtpërdrejta ndaj subjekteve opozitare. “Bllokada është zgjedhje. Opozita ka zgjedhur të bllokojë, dhe koston po ua faturon qytetarëve”, ka theksuar Zulfaj.