Skandali i videove intime, Monika Lubonja rrëfehet pa doreza: E vërteta ime për Adrian Hilën

Aktorja e njohur Monika Lubonja ka thyer më në fund heshtjen, pas valës së reagimeve dhe publikimit të pamjeve intime ku pretendohet se ajo është nën shoqërinë e kompozitorit Adrian Hila. Nëpërmjet një deklarate të ndjerë dhe të fortë publike, artistja sqaron se nuk ka dhënë asnjëherë pëlqimin e saj për t'u filmuar apo regjistruar, ndërsa shpërndarjen e këtyre materialeve e cilëson si një goditje të rëndë ndaj jetës private dhe integritetit të saj moral. Ajo u bën thirrje mediave të tregojnë maturi e të mos bëhen pjesë e spekulimeve me video të tilla, ndërsa qytetarëve u kërkon mirëkuptim që të mos e shndërrojnë dramën e saj personale në një spektakël gjykimi publik. "Ju drejtohem sot me dhimbjen e një gruaje së cilës i është shkelur besimi dhe privatësia, por edhe me vendosmërinë e palëkundur për të mbrojtur dinjitetin dhe të drejtat e mia", shprehet Lubonja në rrëfimin e saj. Më tej, ajo kërkon që të marrë fund fushata e baltosjes në emër të një morali të rremë kolektiv. Sipas saj, nderi i njeriut ndërtohet me sakrifica gjatë gjithë jetës dhe nuk mund të shkatërrohet nga veprimet e ulëta të dikujt të cilit i fali vite nga jeta e saj. Aktorja pranon se ka dashur dhe ka besuar verbërisht, duke shtuar se nuk ndjehet aspak e turpëruar për ndjenjat e sinqerta që ka dhuruar, por e lëndon fakti se besimi i saj u kthye në një armë kundër saj. Ajo përsërit thirrjen drejtuar mediave për të respektuar hapësirën e saj personale dhe u kërkon ndjekësve të mos e përdorin dhimbjen e saj për argëtim apo ta gjykojnë për zgjedhjet e saj sentimentale. Lubonja bën me dije se tashmë i është drejtuar organeve kompetente të drejtësisë dhe do ta ndjekë këtë çështje hap pas hapi deri në zbardhjen e plotë të saj, duke theksuar se nuk ka ndërmend t'ia falë askujt këtë pabesi që abuzoi me jetën e saj. Në mbyllje të reagimit, ajo tregon se gjen forcë te besimi në Zot, me shpresën se e vërteta do të dalë në dritë dhe drejtësia do të veprojë, duke mos lejuar që zemra e saj të mbushet me urrejtje nga kjo plagë e rëndë.