Skandali i videove intime, Monika Lubonja: Nuk kam dhënë kurrë pëlqimin, çështja ka kaluar në drejtësi

Aktorja e njohur Monika Lubonja ka thyer heshtjen pas publikimit në rrjet të videove intime me Adrian Hilën, duke deklaruar se e gjithë kjo situatë është bërë pa dijeninë dhe pa pëlqimin e saj për t'u xhiruar apo shpërndarë. Përmes një postimi të gjerë në llogaritë e saj zyrtare, Lubonja bën të ditur se i është drejtuar tashmë organeve kompetente të drejtësisë dhe se do ta ndjekë këtë çështje hap pas hapi deri në zbardhjen e plotë të saj. “Ju drejtohem sot me dhimbjen e një gruaje së cilës i është shkelur besimi dhe privatësia, por edhe me vendosmërinë për të mbrojtur dinjitetin dhe të drejtat e saj”, nis kështu reagimi i aktores. Më tej, ajo u bën thirrje mediave dhe qytetarëve që të tregojnë reflektim, duke kërkuar që të ndalet linçimi publik dhe çdo tentativë për ta kthyer situatën e saj të rëndë në spektakël apo gjykim moral. Ajo shton se nuk turpërohet nga dashuria që ka dhënë në të kaluarën, por ndien dhimbje që besimi i saj u keqpërdor dhe u kthye në një armë kundër saj nga një njeri i pabesë. Në përmbyllje të mesazhit të saj, Monika Lubonja shpreh bindjen e plotë se e vërteta do të dalë në dritë nëpërmjet rrugës ligjore, ndërsa kërkon forcë nga Zoti që të mos lejojë që kjo plagë t'i mbushë zemrën me urrejtje.