Protesta para Parlamentit, Berisha: Nuk jemi ne drejtuesit e tubimit të qytetarëve, të enjten tubim kombëtar

Kryetari i Partisë Demokratike, Sali Berisha, ka bërë të qartë qëndrimin lidhur me tubimin kombëtar të paralajmëruar për ditën e enjte përpara Kuvendit të Shqipërisë. Gjatë një bashkëbisedimi me qytetarët në qytetin e Lezhës, ai iu përgjigj zhvillimeve aktuale në kryeqytet, duke theksuar se forca politike që ai drejton nuk ka për qëllim të marrë kontrollin e protestës qytetare. “Ka një protestë në Tiranë. Qëndrimi ynë ka qenë, është bazuar në një qëndrim të drejtë moral: së pari, nuk e kemi thirrur e nuk marrim ne drejtimin, së dyti e mbështesim me gjithë forcën tonë, bëjmë gjithçka që të mos përçahet dhe të mos e manipulojnë”, u shpreh ai. Më tej, kreu i opozitës njoftoi se për ditën e enjte është thirrur një protestë e veçantë kombëtare, e cila do të ketë karakter qytetar. Ai shpjegoi se nisma vjen pasi, ngjashëm me protestat e zhvilluara në disa bashki ku qytetarë të majtë e të djathtë kërkojnë të drejtat e tyre, edhe pasnesër para Parlamentit do të jenë njerëz të të gjitha bindjeve politike. Sipas tij, kjo thirrje bëhet për të mbrojtur një të drejtë thelbësore dhe qeverisjen vendore, e cila është jetike për çdo qytetar. Nga Lezha, Berisha lëshoi edhe ftesën zyrtare: “Nga Lezha ftoj shqiptarët në orën 10 ditën e enjte te parlamenti.” Në fjalën e tij, ai nuk la pa përmendur as ekzekutivin, duke e cilësuar nismën e kryeministrit si të dëmshme për vendin: “Reforma e Edi Ramës, reformë anti-qytetare, antishqiptare, reformë me të cilën ai kërkon të braktisë më shumë Shqipërinë”.