Skadimi i afatit kushtetues për presidentin: Kuvendi ende pa thirrje zyrtare për seancë

Koha po ngushtohet ndjeshëm, pasi kanë mbetur vetëm edhe pak orë deri në orën 24:00, orë kjo që shënon edhe përfundimin e afatit të caktuar nga Gjykata Kushtetuese për zgjedhjen e kreut të shtetit. Deri në këto momente, në Kuvendin e Kosovës nuk vërehet asnjë lëvizje apo sinjal se mund të mbahet ndonjë seancë plenare gjatë mbrëmjes së sotme. Ndërkohë, Partia Demokratike e Kosovës (PDK) vazhdon të insistojë që legjislativi të procedojë me miratimin në lexim të dytë të Projektligjit për ndryshimet në Ligjin për Gjykatën Speciale. Në krahun tjetër, kryeministri dhe njërkohësisht kryetari i Lëvizjes Vetëvendosje, Albin Kurti, kërkon që zgjedhja e presidentit të kryhet sonte, ndërsa votimi i Projektligjit për Specialen në lexim të dytë të shtyhet për të enjten. Për të sqaruar qëndrimet e tij, Kurti ka paralajmëruar një konferencë për media për orën 19:45. Në zhvillimet e tjera jashtë institucioneve, Iniciativa “Jo në emrin tim” ka njoftuar se do të organizojë një protestë sonte në orën 21:00, e cila do të mbahet në sheshin “Skënderbeu” në Prishtinë.