Nju Jork: Universiteti Fordham mirëpret Samitin e parë historik të studentëve shqiptaro-amerikanë

Në ambientet e Universitetit Fordham në Nju Jork është mbajtur me sukses Samiti i Parë Vjetor i Studentëve Shqiptaro-Amerikanë, një ngjarje e rëndësishme që ka bashkuar të rinj nga diasporat tona. Në grupin e organizatorëve të këtij eventi të shënuar bën pjesë studenti shqiptar me rrënjë nga Plava dhe Gucia, Art Lecaj, i cili ka qenë ndër kontribuesit kryesorë të nismës. Krahas Lecajt, në tryezën e organizimit kanë dhënë kontributin e tyre edhe Leona Gjevukaj nga Peja e Kosovës, si dhe Ervin Toro nga Shqipëria, në bashkëpunim të ngushtë me Organizatën Kombëtare Shqiptaro-Amerikane (AANO). Përmes një deklarate në rrjetet sociale, Art Lecaj ka shfaqur krenarinë e tij të thellë për punën e bërë dhe mundësinë për të bashkuar studentë shqiptarë që vijnë nga realitete dhe komunitete të ndryshme. Ky samit është konceptuar si një platformë strategjike për të nxitur rrëzimin e barrierave, forcimin e bashkëpunimit dhe ndërtimin e një komuniteti më të lidhur mes të rinjve shqiptarë, duke u krijuar atyre hapësira për shkëmbimin e ideve dhe krijimin e kontakteve të vlefshme për të ardhmen.