Prokuroria Speciale e Kosovës ka hedhur poshtë kallëzimin penal të kryetarit të tanishëm të Vushtrrisë, Ferit Idrizi, të ushtruar ndaj ish-kryetarit të Vushtrrisë, Xhafer Tahiri, për veprën penale – keqpërdorim i pozitës zyrtare. Objekt i këtij kallëzimi penal kanë qenë 22 kontrata që ishin lidhur me operator ekonomikë për dhënien në shfrytëzim afatgjatë të pronës së paluajtshme komunale në fshatin Lumadh të komunës së Vushtrrisë. Në atë kohë 22 biznese ishin përzgjedhur për t’u vendosur në Parkun e Biznesit nga një komision vlerësues i formuar nga Kuvendi Komunal. Prokuroria pasi kishte trajtuar këtë rast, duke dëgjuar dëshmitarë e administruar prova materiale, ka gjetur se nuk ka dyshim se është kryer vepra penale – keqpërdorim i detyrës zyrtare dhe as nuk ka dyshim se është kryer ndonjë vepër tjetër penale e cila ndiqet zyrtarisht. “Përkatësisht në veprimet e të dyshuarit nuk formësohen elementet e veprës penale si në kallëzimin penal, e as ndonjë vepër penale tjetër, e cila ndiqet sipas detyrës zyrtare”- thuhet në vendimin e Prokurorisë Speciale. Vendimi për hedhjen poshtë të kallëzimit penal është marrë më 24.04.2025. Sipas kallëzimit penal, kryetari i atëhershëm i Vushtrrisë pretendohej se kishte vepruar në kundërshtim me dispozitat ligjore të ligjit për dhënien në shfrytëzim dhe këmbim të pronës së paluajtshme në rastin e nënshkrimit të 22 kontratave me operatorët ekonomikë. Për këtë rast ishin parashtruar dy kallëzime penale, të cilat meqenëse kishin të njëjtin objekt shqyrtimi, nga Prokuroria Speciale janë bashkuar dhe janë cilësuar si një rast i vetëm. “Kjo lëndë penale ishte zgjidhur me aktvendim për hedhje të kallëzimit penal PPS.nr 76/22 e datës 29.12.2023. Pas parashtrimit të ankesës nga ana e Komunës së Vushtrrisë, Prokuroriaa e Apelit e Kosovës me aktvendimin AKAP.r 14.24, datë 06.02.2024 kishte vendosur që kjo çështje penale të rivlerësohet dhe rivendoset nga PSRK. Ky vendim është nxjerrë pas veprimeve të ndërmarra nga prokuroria dhe hetuesit e autorizuar,, në zbatim të rekomandimeve të dhëna nga Prokuroria e Apelit”- thuhet në fusnotën e cila është e vendosur në vendimin e PSRK për hedhje të kallëzimit penal. Në konstatimet se nuk është kryer vepra penale nga Xhafer Tahiri Prokuroria thekson se procedura për dhënien në shfrytëzim të parcelave të ndjekura nga Komuna e Vushtrrisë mund të jenë kryer shkelje ligjore, por jo të natyrës penale, të cilat do të kishin interes për organin e ndjekjes penale, Përgjegjësia e të dyshuarit në këtë rast, Xhafer Tahiri, në cilësinë e kryetarit të Komunës së Vushtrrisë, sipas Prokurorisë, i atribuohet llogaridhënies politike dhe administrative sepse për sajimin e përgjegjësisë penale është e domosdoshme që të vërtetohet se ai ka vepruar me qëllim, duke shkelur ligjin, për të përfituar për vete ose për personat e tretë ose me qëllim që t’i shkaktohet dëm komunës në këtë rast. Vendimi i cili ishte marrë nga Komuna e Vushtrrisë që sipas Prokurorisë ishte i kundërligjshëm për shkak se përmbante një dispozitë që ishte në kundërshtim me disa ligje të tjera, kishte marrë dritën e gjelbër nga Ministria e Administrimit të Pushtetit Lokal, por që sipas Prokurorisë tashmë nuk janë relevante për objektin e kësaj çështjeje penale. Sipas Prokurorisë, Kuvendi Komunal kishte nxjerrë vendim të cilin kryetari i Komunës në parim është dashur që ta zbatojë, ndonëse do duhej që secili nga ta të kujdeset që të mos kryejë shkelje të rregullave, procedurave apo ligjit material. Sipas Prokurorisë, për t’i eliminuar pasojat e një vendimi të tillë, Kuvendi i Komunës së Vushtrrisë në mbledhjen e mbajtur më 31.01.2023 kishte shfuqizuar në tërësi vendimin kontestues të datës 15.04.2021, më të cilin janë shmangur edhe pasojat eventuale të këtij vendimi të kundërligjshëm, nëse do të mbetej në fuqi. “Në këtë çështje penale, nuk rezulton të jetë shkaktuar dëm material ndaj komunës, si një nga elementet e veprës penale për të cilën është dyshuar. Këtë konstatim e ka ofruar në deklarimin e tij edhe përfaqësuesi i autorizuar i Komunës së Vushtrrisë Ismet Gashi, duke konstatuar se “…nga ky proces, deri më tani, Komuna jonë nuk ka qenë e dëmtuar, por as nuk ka përfituar, sepse në tri vitet e para OE kanë qenë të liruar nga pagesa e qirasë””- thuhet në arsyetimin e vendimit për hedhje të kallëzimit penal. Komisioni për Verifikimin e Pronës Komunale kishte hartuar një raport me rekomandime në lidhje me dhënien në shfrytëzim të parcelave në parkun industrial në Lumadh në vitin 2021. Në atë kohë 22 biznese ishin përzgjedhur për t’u vendosur në Parkun e Biznesit nga një komision vlerësues i formuar nga Kuvendi Komunal. Kuvendi Komunal i Vushtrrisë më 16.04.2021 në mbledhje të jashtëzakonshëm kishte miratuar pikën e vetme të rendit të ditës, vendosjen e bizneseve në Parkun Industrial në Lumadh.