Skenë dhune në Kuvendin e Armenisë: Ndërpritet seanca pas përleshjes fizike mes deputetëve

Puna në Kuvendin e Armenisë është ndërprerë gjatë ditës së sotme, pasi në sallë ka shpërthyer një konflikt fizik mes përfaqësuesve të opozitës dhe atyre të shumicës parlamentare. Tensioni u ngrit gjatë një përplasjeje verbale mes deputetit opozitar, Edgar Ghazaryan, dhe zëvendëskryetarit të parlamentit, Ruben Rubinyan, i cili drejtonte seancën. Debati mori flakë pasi Ghazaryan adresoi kritika të forta ndaj punës së legjislativit dhe mënyrës së menaxhimit të fondeve publike. Si kundërpërgjigje, Rubinyan vendosi t'i ndërpriste mikrofonin, duke theksuar se komentet e tij nuk kishin asnjë lidhje me temat e parapara në rendin e ditës. Kjo masë nxiti menjëherë një përplasje fizike në sallë mes ligjvënësve të dy kampeve politike, qeveritare dhe opozitare. Sipas informacioneve nga terreni, situata degjeneroi deri në hedhjen e shisheve, ndërkohë që agjentët e sigurimit u detyruan të ndërhyjnë urgjentisht për të qetësuar gjakrat dhe për të ndarë deputetët e përfshirë në konflikt. Megjithatë, fërkimet vijuan edhe jashtë sallës plenare, në korridoret e ndërtesës, ku efektivët e sigurisë u desh të ndërhynnin sërish për të shmangur përshkallëzimin e mëtejshëm të situatës. Pas një pauze të detyruar për rivendosjen e qetësisë, punimet e seancës u rikthyen, ndërsa kryesuesi Rubinyan u bëri thirrje të gjithë ligjvënësve që të respektojnë rregulloren dhe t'i përmbahen estrictisht rendit të ditës.