Përsëritet historia në Fier: Kamionçina humb kontrollin dhe rrëzon shtyllën e ndriçimit në Sheq të Madh

Një tjetër aksident rrugor ka tronditur mbrëmjen e djeshme lagjen Sheq i Madh në qytetin e Fierit, pasi një mjet tip kamionçinë ka dalë nga rruga dhe ka përfunduar në korsinë e kundërt, duke shkaktuar dëme materiale dhe rrëzuar një shtyllë ndriçimi. Të dhënat e para nga vendi i ngjarjes sugjerojnë se shkak i këtij incidenti mund të ketë qenë lëvizja e automjetit me shpejtësi tej normave të lejuara. Uniformat blu kanë mbërritur menjëherë në zonë dhe po vijojnë hetimet për të zbardhur plotësisht rrethanat dhe për të dokumentuar ngjarjen. Ndërkohë, ky aksident ka rikthyer në vëmendje shqetësimin e banorëve vendas, të cilët ngrenë alarmin për qarkullimin e shpejtë të mjeteve në këtë aks, sidomos gjatë orëve të natës. Ata i bëjnë thirrje urgjente Bashkisë që të ndërhyjë me masa konkrete për sigurinë rrugore, duke kërkuar vendosjen e shpejtësisë-kufizuesve apo tabelave shtesë. Vlen të theksohet se kjo nuk është ngjarja e parë e këtij lloji në këtë segment, pasi vetëm katër ditë më parë, në të njëjtin vend, një tjetër përplasje rezultoi sërish me dëmtimin e infrastrukturës publike dhe të një shtylle ndriçimi.