Konjufca nga Nju Jorku: Partneriteti rajonal lyp barazi, besim dhe mbrojtje të sovranitetit

Zëvendëskryeministri i Kosovës, Glauk Konjufca, ka theksuar se partneriteti mes vendeve të rajonit mund të funksionojë vetëm mbi themelet e besimit reciprok, barazisë së plotë dhe respektimit të pandashmërisë së kufijve dhe sovranitetit shtetëror. Këto komente ai i ka bërë përmes një shkrimi në platformën X, ndërsa po merr pjesë në ngjarjet e Javës së Nivelit të Lartë të Sesionit të 81-të të Asamblesë së Përgjithshme të OKB-së, e cila po zhvillohet në qytetin e Nju Jorkut. Ai ka konfirmuar se ka qenë i pranishëm në drekën e punës të organizuar bashkërisht nga Procesi i Bashkëpunimit të Evropës Juglindore (SEECP) dhe Nisma e Evropës Qendrore (CEI). Me këtë rast, zyrtari i lartë kosovar i ka përcjellë mirënjohje ministres së Punëve të Jashtme të Rumanisë, Oana Țoiu, për angazhimin e saj në pritjen dhe drejtimin e këtij debati të rëndësishëm kushtuar perspektivës së bashkëpunimit rajonal. “Teksa shënojmë tri vjet nga sulmi terrorist në Banjskë, në të cilin u vra rreshteri i Policisë së Kosovës, Afrim Bunjaku, theksova se bashkëpunimi duhet të mbështetet në besim, barazi dhe respekt për sovranitetin dhe integritetin territorial”, ka shkruar Konjufca në mesazhin e tij. Sipas diplomacisë kosovare, ky parim merr një peshë edhe më të madhe në periudhën aktuale, kur si Ballkani ashtu edhe kontinenti evropian posfidohen nga rreziqe hibride dhe nga një trysni e shtuar gjeopolitike. “Për Republikën e Kosovës, bashkëpunimi rajonal duhet ta plotësojë, e jo ta zëvendësojë, aspiratën tonë të përbashkët evropiane, duke sjellë njëkohësisht rezultate konkrete përmes lidhjeve më të mira rajonale, tregtisë, energjisë, bashkëpunimit digjital, mobilitetit dhe qëndrueshmërisë”, ka deklaruar Konjufca. Në vlerësimin e tij, këto platforma ndërkombëtare duhet të maten vetëm në bazë të dobisë praktike që u sjellin qytetarëve në përditshmërinë e tyre. “Të rinjtë tanë duan mundësi, mobilitet dhe mirëqenie, ndërsa përgjegjësia jonë është t’i krijojmë këto mundësi këtu, në rajonin tonë”, ka përfunduar ai.