Ish-ministri i Mbrojtjes jep alarmin: Situata aktuale në Kosovë, triumfi më i madh i shërbimeve ruso-serbe kundër shqiptarëve

Ngjarjet e fundit që po kalon Kosova pas vendimeve të fundit të Gjykatës Speciale në Hagë përbëjnë një prej goditjeve më të rënda dhe sukseset më të mëdha të strukturave sekrete ruse dhe serbe ndaj interesave kombëtare shqiptare në rajon gjatë dekadës së fundit. Ky është qëndrimi i ashpër dhe paralajmërimi i dhënë nga ish-ministri i Mbrojtjes, Pirro Vengu, i cili gjatë një paraqitjeje televizive në emisionin "Top Story", ka vënë theksin te domosdoshmëria e vigjilencës, duke e cilësuar të nesërmen si një ditë vendimtare dhe kritike për fatet e shtetit të Kosovës. Gjatë analizës së tij, Vengu ka ngritur shqetësimin mbi mungesën e theksuar të një bashkërendimi institucional dhe politik mes autoriteteve në Prishtinë dhe Tiranë. Sipas tij, dialogu dhe komunikimi dypalësh kanë munguar plotësisht, qoftë në nivel qeveritar apo ndërpartiak, ndërsa pozicioni zyrtar i të dy shteteve është kufizuar vetëm në deklarata retorike brenda sallave të parlamenteve respektive. Duke analizuar ngërçin aktual, ai ka theksuar se situata bëhet edhe më alarmante për shkak të ndërthurjes së disa krizave njëkohësisht. "Është evidente që ka dy kriza që janë bërë bashkë në këto 48 orë të fundit, kriza e tejzgjatur politike dhe institucionale në Kosovë dhe vendimi i Hagës që është vetëftuar në dilemat politike të Kosovës", është shprehur Vengu. Ai ka shtuar se afatet kohore janë tashmë drejt fundit, ku brenda 24 orëve skadon afati kushtetues për zgjedhjen e presidentit të ri, duke e vendosur vendin para një udhëkryqi të rrezikshëm institucional. "Në dijeninë time nuk ka pasur koordinim me qeverinë e Shqipërisë as në nivel partiak as qeveritar nga shteti i Kosovës sa i takon hapave që duhet të marrim kombëtarisht pas vendimit të Hagës. Ne duhet të gjejmë resurse brenda nesh për të kuptuar se ajo që po i ndodh Kosovës është një nga arritjet më të mëdha të agjenturave ruse dhe serbe përkundrejt faktorit shqiptar në rajon padyshim në dekadën e fundit", ka përfunduar deklaratën e tij ish-ministri.