Thirrje urgjente nga OVL-UÇK: Të gjithë qytetarët në shesh që në orët e para të mëngjesit

Organizata e Veteranëve të Luftës së Ushtrisë Çlirimtare të Kosovës u ka drejtuar një thirrje publike të gjithë qytetarëve dhe protestuesve, duke kërkuar që nesër në mëngjes të grumbullohen sërish në sheshin kryesor të Prishtinës. Kjo thirrje vjen në një moment kritik politik, pasi dita e nesërme shënon afatin e fundit kushtetues për zgjedhjen e presidentit të ri, në të kundërt vendi do të drejtohet drejt zgjedhjeve të jashtëzakonshme brenda një afati prej 45 ditësh. Gjithashtu, kjo datë përkon edhe me afatin e fundit për votimin në lexim të dytë të paketës së ndryshimeve dhe plotësimeve që i bëhen Ligjit për Gjykatën Speciale. Nëpërmjet një njoftimi të publikuar në rrjetet sociale, kjo organizatë ka kërkuar mobilizim të përgjithshëm: “Popull i dashur. Kategori të dala nga lufta e UÇK-së. Nesër, mëngjesi duhet të na gjejë të gjithëve në sheshin e Prishtinës. Të bashkuar dhe me dinjitet, për të mbrojtur atë që është e jona dhe për të dëshmuar se UÇK-ja na bashkon”.